خون کا ایک عطیہ نئی زندگی کی ضمانت بن سکتا ہے، وزیر اعلیٰ بلوچستان

کوئٹہ: وزیر اعلیٰ بلوچستان میر سرفراز بگٹی نے ورلڈ بلڈ ڈونر ڈے کے موقع پر اپنے پیغام میں کہا ہے کہ یہ دن انسانیت کی خدمت، ایثار اور سماجی ذمہ داری کے جذبے کو اجاگر کرنے کا دن ہے۔ انہوں نے کہا کہ خون کا ایک عطیہ کسی انسان کے لیے نئی زندگی اور امید کا پیغام بن سکتا ہے جبکہ محفوظ اور رضاکارانہ خون کی دستیابی ایک مؤثر نظامِ صحت کی بنیادی ضرورت ہے۔

وزیر اعلیٰ نے کہا کہ حادثات، سرجریوں، زچگی اور مختلف امراض میں مبتلا مریضوں کی زندگیاں بروقت خون کی فراہمی سے وابستہ ہیں۔ انہوں نے کہا کہ حکومت بلوچستان عوام کو بروقت طبی سہولیات کی فراہمی کے لیے صحت کے شعبے میں تاریخی اصلاحات متعارف کرا رہی ہے۔

میر سرفراز بگٹی نے کہا کہ پیپلز ایئر ایمبولینس سروس دور دراز علاقوں کے مریضوں کو فوری طبی امداد کی فراہمی میں اہم کردار ادا کر رہی ہے اور ایئر ایمبولینس کے ذریعے منتقل کیے جانے والے مریضوں کی جان بچانے میں محفوظ خون کی دستیابی کلیدی اہمیت رکھتی ہے۔

انہوں نے رضاکارانہ خون عطیہ کرنے والے افراد کو انسانیت کے حقیقی محسن قرار دیتے ہوئے نوجوانوں، تعلیمی اداروں اور فلاحی تنظیموں پر زور دیا کہ وہ خون عطیہ کرنے کے کلچر کے فروغ میں بھرپور کردار ادا کریں۔ وزیر اعلیٰ نے عوام سے اپیل کی کہ خون عطیہ کرنے کی روایت کو فروغ دے کر قیمتی انسانی جانوں کے تحفظ میں اپنا کردار ادا کریں۔