مسلم باغ میں موبائل نیٹ ورک کا شدید بحران، عوام پریشان

مسلم باغ: مسلم باغ شہر میں موبائل نیٹ ورک کی ناقص کارکردگی کے باعث عوام شدید مشکلات کا شکار ہیں۔ شہریوں کے مطابق Jazz، Zong، Telenor اور Ufone سمیت تمام موبائل نیٹ ورکس بجلی موجود ہونے کے باوجود انتہائی سست روی کا شکار رہتے ہیں جبکہ لوڈشیڈنگ ہوتے ہی سگنل “E” پر آجاتا ہے اور انٹرنیٹ سروس تقریباً مکمل طور پر معطل ہو جاتی ہے۔

شہریوں کا کہنا ہے کہ اس صورتحال سے طلبہ و طالبات اور کاروباری طبقہ سب سے زیادہ متاثر ہو رہے ہیں۔ آن لائن کلاسز، یونیورسٹی پورٹلز، تعلیمی ویڈیوز اور دیگر آن لائن سرگرمیاں شدید متاثر ہیں جبکہ والدین مہنگے ڈیٹا پیکجز خریدنے کے باوجود مطلوبہ سہولت حاصل نہیں کر پا رہے۔

تاجروں اور کاروباری افراد کے مطابق بینکنگ ایپس، جاز کیش، ایزی پیسہ اور واٹس ایپ بزنس جیسی ضروری سروسز بھی اکثر بند رہتی ہیں جس سے مالی لین دین متاثر اور روزانہ ہزاروں روپے کا نقصان ہو رہا ہے۔

مسلم باغ کی سیاسی، سماجی اور تاجر تنظیموں نے موبائل کمپنیوں اور پاکستان ٹیلی کمیونیکیشن اتھارٹی (PTA) سے مطالبہ کیا ہے کہ نیٹ ورک کے دیرینہ مسئلے کو فوری طور پر حل کیا جائے، موبائل ٹاورز پر مؤثر بیک اپ سسٹم نصب کیے جائیں اور فائبر آپٹک کے ذریعے 4G سروس کو مستحکم بنایا جائے۔

انہوں نے خبردار کیا کہ اگر مسئلے کے حل کے لیے فوری عملی اقدامات نہ کیے گئے تو عوام احتجاج، دھرنوں، سڑکوں کی بندش اور کمپنیوں کی فرنچائزز کے سامنے مظاہروں کا راستہ اختیار کرنے پر مجبور ہوں گے، جس کی تمام تر ذمہ داری موبائل کمپنیوں اور متعلقہ اداروں پر عائد ہوگی۔