کوئٹہ: سول اسپتال کی او پی ڈی بند، مریض مشکلات کا شکار

کوئٹہ: سول اسپتال میں ڈاکٹروں کے احتجاج اور او پی ڈی سروسز کے بائیکاٹ کے باعث روزانہ علاج کے لیے آنے والے سینکڑوں مریض شدید مشکلات کا سامنا کر رہے ہیں۔ او پی ڈی بند ہونے سے خصوصاً غریب، نادار اور دور دراز علاقوں سے آنے والے مریض متاثر ہو رہے ہیں، جنہیں علاج معالجے کی سہولیات حاصل کرنے میں دشواری پیش آ رہی ہے۔

عوامی حلقوں کا کہنا ہے کہ احتجاج کے نتیجے میں حکومت کے بجائے عام شہری اور مریض متاثر ہو رہے ہیں۔ انہوں نے مطالبہ کیا ہے کہ مریضوں کی مشکلات کے پیش نظر او پی ڈی سروسز جلد بحال کی جائیں۔

شہریوں نے یہ بھی تجویز دی ہے کہ جب تک احتجاج جاری ہے، ڈاکٹر حضرات نجی اسپتالوں اور کلینکس میں مستحق مریضوں کو مفت طبی سہولیات فراہم کریں تاکہ علاج کے منتظر افراد کو ریلیف مل سکے۔

واضح رہے کہ سول اسپتال کوئٹہ میں ڈاکٹر ماہ نور ناصر پر تیزاب گردی کے واقعے کے بعد ڈاکٹرز نے احتجاج کرتے ہوئے اپنے مطالبات کے حق میں او پی ڈی سروسز کا بائیکاٹ کر رکھا ہے۔