ملازمین کے مسائل حل کئے بغیر بجٹ قبول نہیں کریں گے، پیر محمد کاکڑ

کوئٹہ : پاکستان یونائیٹڈ ورکرز فیڈریشن کے صوبائی جنرل سیکرٹری اور کیسکو لیبر یونین بلوچستان کے صدر پیر محمد کاکڑ نے وفاقی اور صوبائی بجٹ کے حوالے سے اپنے ایک بیان میں کہا ہے کہ ملک بھر کے محنت کش، مزدور، سرکاری ملازمین، پنشنرز اور نچلے طبقے کے عوام شدید معاشی مشکلات کا شکار ہیں۔ مہنگائی، بے روزگاری، بجلی، گیس اور اشیائے خوردونوش کی قیمتوں میں مسلسل اضافے نے عوام کی زندگی اجیرن بنا دی ہے۔ ایسے حالات میں اگر وفاقی اور صوبائی بجٹ میں محنت کشوں اور ملازمین کو حقیقی ریلیف نہ دیا گیا تو پاکستان یونائیٹڈ ورکرز فیڈریشن اور مزدور تنظیمیں ایسے بجٹ کو کسی صورت قبول نہیں کریں گی۔ انہوں نے کہا کہ حکومت کی جانب سے مسلسل نجکاری، ڈاؤن سائزنگ اور ملازمین کے حقوق سلب کرنے کی پالیسیوں نے مزدور طبقے میں شدید بے چینی پیدا کر دی ہے۔ سرکاری اداروں میں ہزاروں کنٹریکٹ، ڈیلی ویجز اور عارضی ملازمین کئی کئی سالوں سے خدمات انجام دے رہے ہیں لیکن انہیں مستقل نہیں کیا جا رہا، جو سراسر ناانصافی ہے۔ حکومت فوری طور پر تمام کنٹریکٹ، ڈیلی ویجز اور عارضی ملازمین کو مستقل کرنے کا اعلان کرے تاکہ ان کے مستقبل کو محفوظ بنایا جا سکے۔ پیر محمد کاکڑ نے کہا کہ پنشنرز کو بھی مسلسل نظر انداز کیا جا رہا ہے۔ پنشن سے مختلف عنوانات کے تحت کی جانے والی کٹوتیاں فوری طور پر ختم کی جائیں اور پرانا پنشن نظام بحال کیا جائے۔ پنشنرز نے اپنی پوری زندگی ریاستی اداروں کی خدمت میں گزاری ہے، اس لئے ان کے حقوق کا تحفظ حکومت کی ذمہ داری ہے۔انہوں نے مطالبہ کیا کہ موجودہ مہنگائی کے تناسب کو مدنظر رکھتے ہوئے سرکاری ملازمین کی تنخواہوں اور تمام الاؤنسز میں کم از کم سو فیصد اضافہ کیا جائے۔ اسی طرح ملک بھر میں کم از کم اجرت کو بھی سو فیصد بڑھایا جائے تاکہ مزدور طبقہ اپنے خاندان کی بنیادی ضروریات پوری کر سکے۔انہوں نے کہا کہ موجودہ اجرت اور تنخواہیں مہنگائی کے مقابلے میں انتہائی ناکافی ہیں اور محنت کش طبقہ بدترین معاشی دباؤ کا شکار ہے۔حکومت قومی اداروں کی نجکاری کے فیصلوں پر نظرثانی کرے۔ قومی ادارے ملک کے اثاثے ہیں، انہیں فروخت کرنے کے بجائے انتظامی اور مالی اصلاحات کے ذریعے مضبوط بنایا جائے۔

Browse Posts

پشتونخوا میپ اور این ڈی ایم کا مشترکہ جمہوری جدوجہد پر اتفاق

سردارزادہ فیصل خان جمالی عوامی خدمت اور ترقیاتی منصوبوں میں نمایاں کردار ادا کر رہے ہیں، میر مرزا خان مینگل

لاڑکانہ عدالت نے سابقہ ایس ایچ او کو دو برس قید کی سزا سنادی