پنجگور میں سکیورٹی فورسز کا کامیاب آپریشن، 6 بھارتی حمایت یافتہ دہشت گرد ہلاک

راولپنڈی/پنجگور: سکیورٹی فورسز نے بلوچستان کے ضلع پنجگور میں خفیہ اطلاع پر کامیاب انٹیلی جنس بیسڈ آپریشن کرتے ہوئے بھارتی حمایت یافتہ 6 دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق کارروائی دہشت گردوں کی موجودگی کی مصدقہ اطلاع پر کی گئی، جس دوران فورسز نے دہشت گردوں کے متعدد ٹھکانوں کو نشانہ بنایا اور شدید مقابلے کے بعد 6 خارجی مارے گئے۔

آئی ایس پی آر کے مطابق ہلاک دہشت گردوں کے قبضے سے بھاری مقدار میں اسلحہ، گولہ بارود، دیسی ساختہ بم (آئی ای ڈیز) اور ایک گاڑی بھی برآمد کی گئی۔ سکیورٹی اداروں کا کہنا ہے کہ ہلاک ہونے والے دہشت گرد مختلف دہشت گرد کارروائیوں میں ملوث تھے۔

بیان میں کہا گیا ہے کہ علاقے میں موجود کسی بھی بھارتی سرپرستی یافتہ دہشت گرد کے خاتمے کے لیے کلیئرنس آپریشن جاری ہے اور سکیورٹی فورسز مکمل عزم کے ساتھ دہشت گردی کے ناسور کے خاتمے کے لیے سرگرم عمل ہیں۔

آئی ایس پی آر نے مزید کہا کہ پاکستان کی سکیورٹی فورسز اور قانون نافذ کرنے والے ادارے وفاقی ایپکس کمیٹی کے منظور کردہ وژن ’’عزمِ استحکام‘‘ کے تحت دہشت گردی کے خلاف اپنی مہم پوری قوت کے ساتھ جاری رکھیں گے تاکہ ملک سے بیرونی سرپرستی یافتہ دہشت گردی کا مکمل خاتمہ یقینی بنایا جا سکے۔