شاہو قلندر مزار کی بحالی مکمل، تاریخی ورثہ نئی شان سے بحال

کوئٹہ/پنجگور: بلوچستان کے تاریخی و روحانی ورثے “شاہو قلندر” کے مزار کی بحالی اور تزئین و آرائش کا منصوبہ کامیابی سے مکمل کر لیا گیا ہے۔ خستہ حال مزار کی مرمت کے بعد یہ قدیمی ورثہ اب اپنی اصل خوبصورتی کے ساتھ نمایاں حیثیت اختیار کر گیا ہے۔

یہ منصوبہ تقریباً 18 ملین روپے کی لاگت سے مکمل کیا گیا، جسے ایف سی بلوچستان (ساؤتھ) نے ماہر اداروں اور والڈ سٹی لاہور اتھارٹی کے تعاون سے ریکارڈ مدت میں پایہ تکمیل تک پہنچایا۔ وزیراعلیٰ بلوچستان میر سرفراز بگٹی نے منصوبے کے اعلیٰ معیار اور بروقت تکمیل پر ایف سی بلوچستان (ساؤتھ) کی کارکردگی کو سراہا۔

مزید برآں، خدابادان فورٹ پنجگور اور پنوں فورٹ تربت کی بحالی کی ذمہ داری بھی ایف سی بلوچستان (ساؤتھ) کو سونپ دی گئی ہے۔ وزیراعلیٰ بلوچستان نے پنجگور کے دورے کے دوران عوامی رابطوں اور ترقیاتی سرگرمیوں میں تیزی لانے پر زور دیا اور کھلی کچہری میں عوامی مسائل براہ راست سنے۔

اس موقع پر گورنمنٹ بوائز ڈگری کالج خدابادان کی مرمت کے لیے 10 ملین روپے کی منظوری دی گئی جبکہ پنجگور میں زیتون آئل پلانٹ کے قیام کا اعلان بھی کیا گیا۔ عوامی سہولیات کی بہتری کے لیے دو گرین اور ایک پنک بس فراہم کرنے کا اعلان کیا گیا۔

وزیراعلیٰ نے ون ڈاکومنٹ رجیم کے نفاذ کے بعد عوام کو درپیش مسائل کے فوری حل کی ہدایت دیتے ہوئے بارڈر کراسنگ پر ایف آئی اے امیگریشن ڈیسک کے قیام کا حکم دیا۔ ساتھ ہی یونیورسٹی آف مکران پنجگور کیمپس کے مسائل کے حل کے لیے محکمہ تعلیم کو فوری اقدامات کرنے کی ہدایت بھی جاری کی گئی۔