سوئی سدرن گیس کمپنی کی نااہلی ،کوئٹہ میں گیس بحران شدت اختیار کر گیا، عام دنوں میں بھی گیس غائب

کوئٹہ کے شہریوں نے سوئی سدرن گیس کمپنی کی جانب سے گیس کی غیر اعلانیہ اور وقفے وقفے سے فراہمی پر شدید ردعمل کا اظہار کرتے ہوئے کہا ہے کہ کمپنی کی ناقص کارکردگی نے عوام کی زندگی اجیرن بنا دی ہے۔

شہریوں کے مطابق پہلے ہی دن میں بمشکل ایک گھنٹہ گیس فراہم کی جاتی تھی، تاہم نئے شیڈول کے بعد صورتحال مزید خراب ہو چکی ہے اور گیس کی دستیابی انتہائی محدود ہو کر رہ گئی ہے۔ ان کا کہنا ہے کہ سردیوں کے اختتام کے باوجود گیس فراہمی میں بہتری نہ آنا اس بات کا ثبوت ہے کہ مسئلہ موسمی نہیں بلکہ انتظامی نااہلی ہے۔

گھریلو صارفین، خصوصاً خواتین، شدید مشکلات کا شکار ہیں جبکہ ہوٹلوں اور چھوٹے کاروباروں کو بھی بھاری نقصان اٹھانا پڑ رہا ہے۔ شہریوں کا کہنا ہے کہ گیس کی عدم دستیابی کے باعث انہیں مہنگے متبادل ذرائع استعمال کرنے پڑ رہے ہیں جس سے مہنگائی کا بوجھ مزید بڑھ گیا ہے۔

انہوں نے اعلیٰ حکام سے مطالبہ کیا کہ گیس کی بلا تعطل فراہمی کو یقینی بنایا جائے اور سوئی سدرن گیس کمپنی کی کارکردگی کا فوری نوٹس لے کر ذمہ داروں کے خلاف کارروائی کی جائے، بصورت دیگر احتجاج کا دائرہ وسیع کیا جائے گا۔