پنجاب حکومت کو بدنام کرکے متبادل انتظام لانے کی کوشش ہو رہی ہے، خواجہ آصف

وزیر دفاع خواجہ آصف نے دعویٰ کیا ہے کہ پنجاب حکومت کو کرپشن کے الزامات کے ذریعے بدنام اور کمزور کرنے کی کوشش کی جا رہی ہے، تاکہ کسی نئے سیاسی گروپ یا متبادل انتظام کے لیے راہ ہموار کی جا سکے۔

نجی ٹی وی کو انٹرویو دیتے ہوئے خواجہ آصف نے کہا کہ بعض سرمایہ دار گزشتہ 8 سے 10 ماہ سے سرگرم ہیں اور بظاہر ایک نئے سیاسی گروپ کی تشکیل کی کوشش کر رہے ہیں۔ ان کے مطابق دو سال بعد انتخابات متوقع ہیں اور ممکن ہے کہ اس گروپ کے پیش نظر نئی سیاسی قیادت سامنے لانے کا منصوبہ ہو۔

وزیر دفاع کا کہنا تھا کہ کرپشن صرف پنجاب کا مسئلہ نہیں بلکہ پورے ملک میں موجود ہے، جس کا عام شہری روزمرہ زندگی میں سامنا کرتا ہے۔

مولانا فضل الرحمان سے متعلق گفتگو کرتے ہوئے خواجہ آصف نے کہا کہ انہوں نے ان کے بیان کا جواب دیا، تاہم سیاسی اور نظریاتی اختلافات کو اس حد تک نہیں بڑھانا چاہیے کہ باہمی احترام اور سلام دعا بھی ختم ہو جائے۔ ان کا کہنا تھا کہ تحریک انصاف نے گزشتہ چار سال کے دوران سیاسی ماحول میں تلخی پیدا کی۔

خواجہ آصف نے فکسڈ سیاسی گیم کے تاثر کو مسترد کرتے ہوئے کہا کہ انہوں نے نہ کبھی ایسی سیاست کی ہے اور نہ ہی اس کا حصہ بننے کا ارادہ رکھتے ہیں۔ ان کے خیال میں حکومت مقدمات واپس نہیں لے گی، کیونکہ کسی بھی ڈیل کی سیاسی قیمت بالآخر حکومت کو ادا کرنا پڑ سکتی ہے۔

انہوں نے مسلم لیگ (ن) اور پیپلزپارٹی کے درمیان کرپشن کے معاملے پر اختلافات کا ذکر کرتے ہوئے کہا کہ دونوں جماعتوں کے درمیان اس حوالے سے اختلافات پہلے بھی رہے ہیں اور آئندہ بھی رہ سکتے ہیں۔