فتنۃ الہندوستان کا اپنے مذموم مقاصد کی تکمیل کیلیے خواتین کا استعمال، اہم انکشافات سامنے آگئے

کوئٹہ: پنجگور سے تعلق رکھنے والی ایک کم عمر بلوچ خاتون نے اپنے والدین کے ہمراہ پریس کانفرنس کرتے ہوئے ایک کالعدم تنظیم سے رابطوں اور اس سے وابستہ رہنے کے حوالے سے اہم انکشافات کیے ہیں۔ خاتون نے ماضی کے فیصلوں پر افسوس کا اظہار کرتے ہوئے ریاست سے وفاداری کا عہد بھی کیا۔

پریس کانفرنس کے دوران خاتون نے دعویٰ کیا کہ چچا کے قتل کے بعد تنظیم سے وابستہ افراد نے واٹس ایپ کے ذریعے ان سے رابطہ کیا اور بدلہ لینے پر اکسایا۔ ان کے مطابق انہیں دیگر لڑکیوں کو تنظیم سے منسلک کرنے کا کام بھی سونپا گیا تھا۔

کم عمر خاتون نے مزید دعویٰ کیا کہ انہیں تنظیم کی جانب سے فدائی بننے کی پیشکش کی گئی تھی، تاہم بعد میں انہوں نے اس راستے سے کنارہ کشی اختیار کرلی۔

خاتون نے اپنے سابقہ فیصلوں پر شرمندگی کا اظہار کرتے ہوئے کہا کہ وہ آئندہ ریاست کے ساتھ وفادار رہیں گی۔

واضح رہے کہ یہ تفصیلات کم عمر خاتون کی پریس کانفرنس میں کیے گئے دعوؤں پر مبنی ہیں، جن کی آزادانہ طور پر تصدیق سامنے نہیں آئی۔