حکومتی اعلان کے باوجود کوئٹہ کے نجی اسکولوں میں ڈبل فیس کی وصولی جاری، والدین پریشان

کوئٹہ: حکومت اور ضلعی انتظامیہ کے اعلان کے باوجود کوئٹہ کے متعدد نجی اسکولوں میں سردیوں کی تعطیلات کے تین ماہ کی فیس مبینہ طور پر وصول کرنے کا سلسلہ جاری ہے، جس پر والدین نے شدید تشویش کا اظہار کیا ہے۔

تفصیلات کے مطابق حکومت اور ضلعی انتظامیہ کی جانب سے جاری کردہ پریس ریلیز میں واضح کیا گیا تھا کہ نجی اسکول سردیوں کی تعطیلات کے تین ماہ کی فیس وصول نہیں کریں گے، جبکہ احکامات کی خلاف ورزی کرنے والے اسکولوں کے خلاف قانونی کارروائی کی جائے گی۔

تاہم حکومتی اعلان کے باوجود شہر کے مختلف علاقوں سے شکایات سامنے آرہی ہیں کہ بعض نجی اسکول والدین سے ڈبل فیس وصول کر رہے ہیں۔

والدین کا کہنا ہے کہ جب وہ اسکول انتظامیہ کو حکومتی اعلان سے آگاہ کرتے ہیں تو مبینہ طور پر انہیں جواب دیا جاتا ہے کہ اس حوالے سے کوئی باضابطہ نوٹیفکیشن جاری نہیں ہوا، اس لیے فیس ادا کرنا ہوگی۔

والدین نے ڈپٹی کمشنر کوئٹہ اور ضلعی انتظامیہ سے مطالبہ کیا ہے کہ معاملے کا فوری نوٹس لیتے ہوئے نجی اسکولوں کی فیس وصولی کی تحقیقات کی جائیں اور حکومتی احکامات کی خلاف ورزی کرنے والے اداروں کے خلاف قانونی کارروائی کی جائے تاکہ والدین کو اضافی مالی بوجھ سے نجات مل سکے۔