گوادر کے ساحل پر 30 فٹ لمبی بلیو وہیل مردہ حالت میں برآمد

گوادر: گوادر ایسٹ بے کے ساحل پر دنیا کے سب سے بڑے آبی جانوروں میں شمار ہونے والی تقریباً 30 فٹ لمبی بلیو وہیل مردہ حالت میں پائی گئی۔

تفصیلات کے مطابق بلیو وہیل گزشتہ دو روز سے گوادر کے سمندر میں مختلف مقامات پر تیرتی ہوئی دیکھی جارہی تھی، تاہم بدھ کے روز سمندری لہریں اسے گوادر ایسٹ بے کے ساحل کے قریب لے آئیں، جہاں وہ مردہ حالت میں پائی گئی۔

ساحل پر ملنے والی وہیل کی لمبائی تقریباً 30 فٹ بتائی جارہی ہے۔ واقعے کی اطلاع ملنے کے بعد سمندری حیات کے تحفظ سے متعلق اداروں کی جانب سے صورتحال کا جائزہ لیا جارہا ہے۔

تاحال وہیل کی ہلاکت کی وجہ سامنے نہیں آسکی۔