وزیراعلیٰ بلوچستان کی کم سن شطرنج ماسٹر عبدالرحمٰن سے دلچسپ مقابلہ، والد کو ملازمت دینے کا اعلان

کوئٹہ: وزیراعلیٰ بلوچستان میر سرفراز بگٹی اور کم سن شطرنج ماسٹر عبدالرحمٰن کے درمیان شطرنج کا دلچسپ دوستانہ مقابلہ ہوا، جس کی ویڈیو سوشل میڈیا پر وائرل ہوگئی۔

وزیراعلیٰ میر سرفراز بگٹی نے کم سن شطرنج ماسٹر عبدالرحمٰن کی ذہانت اور صلاحیتوں کو سراہتے ہوئے انہیں تعریفی سرٹیفکیٹ اور نقد انعام سے نوازا۔

اس موقع پر وزیراعلیٰ کو بتایا گیا کہ عبدالرحمٰن کا تعلق کوئٹہ کے ایک غریب خاندان سے ہے اور ان کے والد بے روزگار ہیں، جس پر وزیراعلیٰ نے ان کے والد کو ملازمت فراہم کرنے کا اعلان کیا۔

وزیراعلیٰ میر سرفراز بگٹی کا کہنا تھا کہ شطرنج جیسے ذہنی کھیل نوجوانوں میں غور و فکر، حکمت عملی اور فیصلہ سازی کی صلاحیتوں کو نکھارتے ہیں۔

انہوں نے کہا کہ بلوچستان کے باصلاحیت بچوں کی حوصلہ افزائی اور ان کی صلاحیتوں کو آگے بڑھانے کے لیے ہر ممکن تعاون کیا جائے گا۔