امریکی مداخلت سے مسلم دنیا پراکسی جنگوں اور معاشی بحران کا شکار ہے، مولانا عبدالقادر لونی

جمعیت علماء اسلام نظریاتی پاکستان کے مرکزی امیر مولانا عبدالقادر لونی، مرکزی جنرل سیکرٹری مولانا محمود الحسن قاسمی، سرپرستِ اعلیٰ مولانا ڈاکٹر شمس الہدیٰ، مرکزی نائب امیر مولانا عبداللہ ڈھیر، مرکزی ناٸب امیر مولانا عبدالرؤوف، مرکزی سیکرٹری اطلاعات سید حاجی عبدالستار شاہ چشتی، مرکزی سیکرٹری مالیات حاجی حیات اللہ کاکڑ نےکہا کہ ​امریکہ کی جارحانہ پالیسیوں سے عالمی امن شدید خطرات سے دوچار، مسلم دنیا کو تباہی، پراکسی جنگوں اور معاشی بحران کی طرف دھکیلا جا رہا ہے۔ امریکہ کی جانب سے مسلسل جارحانہ پالیسیاں اور بیرونی مداخلت عالمی اور بالخصوص علاقائی امن و سلامتی کے لیے سنگین خطرے کا باعث بن چکی ہیں۔ انہوں نے کہا کہ جنگ نے ہمیشہ خطوں کو تباہی، بربادی اور عدم استحکام کے سوا کچھ نہیں دیا۔ امریکی جارحانہ پالیسیوں کی وجہ سے اس وقت خطے میں امن و امان کی تبا ہی اور سلامتی کے لیے خطرے کی گھنٹیاں بج رہی ہیں۔ انہوں نے کہا کہ امریکہ نے نام نہاد دہشت گردی کے نام پر پہلے ہی اس خطے کا امن مکمل طور پر برباد کر دیا ہے اور اب مزید بدامنی کی آگ کو طول دینے کی کوشش کی جا رہی ہے۔ اس جنگ کے نام پر لاکھوں بے گناہ مسلمانوں کا خون بہایا گیا اور پورا خطہ دہائیوں پر محیط عدم استحکام کا شکار ہو گیا۔ امریکہ نے عالم اسلام سے نہ صرف امن و سکون چھین لیا گیا ہے بلکہ ان کی معیشت، دفاعی صلاحیت اور ترقی و خوش حالی کو​خانہ جنگی، پراکسی وارز اور سیاسی عدم استحکام کی سازشوں سے چھینا گیا انہوں نے کہا کہ مسلم ممالک اس وقت خونریز خانہ جنگی اور پراکسی جنگوں کا شکار ہیں۔ مسلم دنیا کو مسلسل بیرونی مداخلت، داخلی تصادم اور شدید سیاسی و معاشی عدم استحکام کی لپیٹ میں دھکیل دیا گیا ہے۔