بلوچستان میں پائیدار امن اور ریاستی عملداری ہر صورت یقینی بنائیں گے،وزیر اعلیٰ بلوچستان

کوئٹہ: وزیر اعلیٰ بلوچستان میر سرفراز بگٹی کی زیرِ صدارت ہارڈننگ آف دی اسٹیٹ کانفرنس کا 29واں اجلاس منعقد ہوا، جس میں صوبے کی مجموعی سکیورٹی صورتحال اور جاری ترقیاتی منصوبوں کا جائزہ لیا گیا۔

اجلاس میں وفاقی و صوبائی اداروں، متعلقہ محکموں اور سکیورٹی فورسز کے نمائندوں نے شرکت کی۔ شرکاء نے اسمگلنگ، منشیات، پوست کی کاشت اور دیگر غیر قانونی سرگرمیوں کے خلاف کارروائیاں مزید تیز کرنے پر زور دیا۔

اجلاس میں بی ایریاز کو اے ایریاز میں تبدیل کرنے کے اقدام پر اطمینان کا اظہار کیا گیا اور اسے صوبے کے تمام ڈویژنز میں مؤثر بنانے کے عزم کا اعادہ کیا گیا۔

شرکاء نے کوئٹہ سمیت اہم شہروں میں سیف سٹی منصوبوں کی تکمیل کے لیے فنڈز اور وسائل فراہم کرنے کی ہدایت بھی کی۔

اجلاس میں بلوچستان میں پائیدار امن، قانون کی بالادستی اور ریاستی عملداری کے قیام کے لیے مشترکہ کوششیں جاری رکھنے کے عزم کا اظہار کیا گیا۔