کوئٹہ: امداد اسپتال سے اکرم اسپتال تک کا علاقہ فری ٹریفک زون قرار

کوئٹہ: شہریوں کو ٹریفک کی مشکلات سے نجات دلانے اور آمدورفت کی روانی یقینی بنانے کے لیے امداد اسپتال سے اکرم اسپتال تک کے علاقے کو فری ٹریفک زون قرار دینے کا فیصلہ کرلیا گیا۔

اس حوالے سے ڈپٹی کمشنر کوئٹہ مہراللہ بادینی کی زیرِ صدارت اہم اجلاس منعقد ہوا، جس میں ایڈمنسٹریٹر میٹروپولیٹن کارپوریشن کوئٹہ بشیر احمد بڑیچ، ایس ایس پی ٹریفک دوستین دشتی اور دیگر متعلقہ حکام نے شرکت کی۔ اجلاس میں بلوچستان ہائی کورٹ کے احکامات کی روشنی میں علاقے کو تجاوزات اور غیر ضروری پارکنگ سے پاک رکھنے کے اقدامات پر غور کیا گیا۔

اجلاس میں فیصلہ کیا گیا کہ مذکورہ علاقے میں کسی بھی قسم کی تجارتی سرگرمی کے لیے میٹروپولیٹن کارپوریشن کی جانب سے این او سی یا اجازت نامہ جاری نہیں کیا جائے گا۔ اس کے علاوہ تمام قانونی اور غیر قانونی سائیکل و موٹر سائیکل پارکنگ اسٹینڈز ختم کرکے علاقے کو ہر قسم کی پارکنگ اور تجاوزات سے پاک رکھا جائے گا۔

ڈپٹی کمشنر مہراللہ بادینی اور ایڈمنسٹریٹر بشیر احمد بڑیچ نے متعلقہ حکام کو فیصلوں پر مؤثر عملدرآمد یقینی بنانے کی ہدایت کرتے ہوئے کہا کہ شہریوں کو سہولت فراہم کرنے اور ٹریفک کی روانی برقرار رکھنے کے لیے تمام متعلقہ ادارے مل کر اقدامات کریں گے۔