ٹانک میں پولیو ورکرز اغوا، مہمند میں فائرنگ سے ڈیوٹی پر مامور 2پولیس اہلکار شہید

ضلع مہمند میں پولیو مہم کے دوران پولیس ٹیم پر فائرنگ کے نتیجے میں دو پولیس اہلکار شہید جبکہ ایک اہلکار زخمی ہوگیا۔ واقعے میں ایک حملہ آور بھی زخمی ہوا ہے۔

پولیس ذرائع کے مطابق واقعہ تھانہ پنڈیالی کی حدود میں واقع علاقے تمانزئی میں پیش آیا، جہاں پولیو ٹیم کی سکیورٹی پر مامور اہلکاروں پر نامعلوم مسلح افراد نے فائرنگ کی۔

ڈی پی او مہمند رضا محمد خان کے مطابق شہید اہلکاروں کی شناخت ظہور اور عربی کے نام سے ہوئی ہے، جبکہ زخمی اہلکار صابر کو معمولی چوٹیں آئی ہیں۔ ان کا کہنا تھا کہ واقعے میں ایک حملہ آور بھی زخمی ہوا ہے اور علاقے میں سرچ آپریشن جاری ہے۔

گورنر خیبر پختونخوا فیصل کریم کنڈی نے ٹانک میں چار پولیو ورکرز کے اغوا اور مہمند میں پولیو ٹیم پر حملے کے دوران دو پولیس اہلکاروں کی شہادت پر تشویش اور افسوس کا اظہار کیا ہے۔

گورنر کا کہنا تھا کہ پولیو ورکرز بچوں کے محفوظ مستقبل اور صحت مند پاکستان کے لیے قومی فریضہ انجام دے رہے ہیں۔

مشیر برائے اطلاعات و تعلقاتِ عامہ، ریلیف، بحالی و آبادکاری ثمر ہارون بلور نے بھی مہمند میں پولیس اہلکاروں پر فائرنگ اور ٹانک میں پولیو ورکرز کے اغوا کے واقعات پر افسوس کا اظہار کیا۔