امن و امان، سرمایہ کاروں کا تحفظ اور ترقیاتی منصوبوں کی تکمیل اولین ترجیح ہے، آئی جی ایف سی

رپورٹ: محمد اصغر خان کھوسہ

کوئٹہ: انٹرنیشنل ریسز اکنامک کوریڈور (IOEC) کے چیئرمین چوہدری غلام مصطفیٰ انصاری کی خصوصی ہدایت پر بلوچستان کے صوبائی صدر جہانگیر لانگو نے آئی جی ایف سی سے اہم ملاقات کی، جس میں گرینڈ جاوی ہاؤسنگ اسکیم کے معاملات، درپیش مسائل، علاقے میں امن و امان کی صورتحال اور ترقیاتی منصوبوں کی پیش رفت پر تفصیلی تبادلہ خیال کیا گیا۔

ملاقات کے دوران جہانگیر لانگو نے ہاؤسنگ اسکیم کو درپیش مسائل اور ترقیاتی سرگرمیوں کے تسلسل کے حوالے سے اپنے تحفظات اور تجاویز پیش کیں۔ اس موقع پر آئی جی ایف سی نے یقین دہانی کرائی کہ جلاؤ گھیراؤ، توڑ پھوڑ اور امن و امان خراب کرنے والے شرپسند عناصر کے خلاف قانون کے مطابق سخت کارروائی عمل میں لائی جائے گی اور کسی کو بھی قانون ہاتھ میں لینے کی اجازت نہیں دی جائے گی۔

آئی جی ایف سی نے اس عزم کا اظہار کیا کہ علاقے میں امن و استحکام برقرار رکھنے، سرمایہ کاروں کے جان و مال کے تحفظ اور ترقیاتی منصوبوں کی تکمیل کے لیے مؤثر اقدامات جاری رکھے جائیں گے۔

ملاقات میں اس امر پر اتفاق کیا گیا کہ پائیدار امن، سرمایہ کاری کے سازگار ماحول اور ترقیاتی سرگرمیوں کا تسلسل بلوچستان کی معاشی و سماجی ترقی کے لیے ناگزیر ہے۔ اس سلسلے میں باہمی رابطوں اور تعاون کو مزید مؤثر بنانے کی ضرورت پر بھی زور دیا گیا۔