پی بی 42 کوئٹہ کی انتخابی عذرداری سماعت کے لیے منظور، زرک خان مندوخیل کو نوٹس جاری

کوئٹہ: بلوچستان ہائی کورٹ نے حلقہ پی بی 42 کوئٹہ فائیو سے متعلق انتخابی عذرداری باقاعدہ سماعت کے لیے منظور کرلی۔

چیف جسٹس کامران ملاخیل اور جسٹس نجم الدین مینگل پر مشتمل بینچ نے شکور اللہ کی جانب سے دائر انتخابی عذرداری کی سماعت کی۔ درخواست میں مسلم لیگ (ن) کے زرک خان مندوخیل کی کامیابی اور ان کے کاغذاتِ نامزدگی کو چیلنج کیا گیا ہے۔

عدالت نے انتخابی عذرداری منظور کرتے ہوئے زرک خان مندوخیل کو سیکرٹری صوبائی اسمبلی بلوچستان کے ذریعے نوٹس جاری کردیا، جبکہ ایڈووکیٹ جنرل بلوچستان اور ایڈیشنل اٹارنی جنرل پاکستان کو بھی نوٹسز جاری کیے گئے ہیں۔