گنداواہ: نوشہرہ تا جھل مگسی روڈ ٹوٹ پھوٹ کا شکار، ایمبولینسوں اور مسافروں کو شدید مشکلات

گنداواہ: نوشہرہ تا جھل مگسی روڈ ٹوٹ پھوٹ کا شکار، ایمبولینسوں اور مسافروں کو شدید مشکلات

گنداواہ (نامہ نگار) نوشہرہ تا جھل مگسی روڈ کی بدحالی نے عوام کو شدید مشکلات سے دوچار کر دیا ہے۔ عرصہ دراز سے اکھاڑ کر چھوڑا گیا روڈ جگہ جگہ پتھروں اور ملبے سے بھرا پڑا ہے، جس کے باعث آمدورفت میں دشواری کے ساتھ گاڑیوں کو بھی نقصان پہنچ رہا ہے۔

خصوصاً ڈی ایچ کیو ہسپتال گنداواہ سے تشویشناک حالت میں مریضوں کو لاڑکانہ ریفر کرنے کے دوران ایمبولینسوں کو شدید مشکلات کا سامنا کرنا پڑتا ہے،جبکہ خراب سڑک کے باعث مریضوں کی تکلیف میں بھی اضافہ ہوتا ہے۔ عوامی حلقوں کے مطابق گاڑیوں کے گزرنے سے اڑنے والے پتھر بھی کئی افراد کو زخمی کرنے اور گاڑیوں کو نقصان پہنچانے کا سبب بن رہے ہیں۔

عوامی و سماجی حلقوں اور شہریوں نے سینئر صوبائی وزیر نوابزادہ طارق خان مگسی سے اپیل کی ہے کہ نوشہرہ تا جھل مگسی روڈ کی تعمیر و مرمت کا کام فوری طور پر مکمل کروایا جائے تاکہ عوام، مسافروں اور خصوصاً ایمرجنسی مریضوں کو سفری مشکلات سے نجات مل سکے۔