بلوچستان؛ سیکیورٹی فورسز کی کارروائیوں میں فتنۃ الہندوستان کے 9 دہشتگرد ہلاک

کوئٹہ: بلوچستان کے اضلاع کچھی اور وڈھ میں سیکیورٹی فورسز نے انٹیلی جنس معلومات کی بنیاد پر دو کارروائیاں کرتے ہوئے 9 دہشت گردوں کو ہلاک کردیا۔ کارروائیوں کے دوران اسلحہ اور گولہ بارود بھی برآمد کیا گیا۔

سیکیورٹی حکام کے مطابق دونوں کارروائیاں 26 اکتوبر کو کی گئیں۔ ضلع کچھی میں دہشت گردوں کے ایک ٹھکانے کی نشاندہی کے بعد کارروائی کی گئی، جہاں فائرنگ کے تبادلے میں 7 دہشت گرد مارے گئے۔

دوسری کارروائی ضلع وڈھ میں کی گئی، جہاں دہشت گردوں کی نقل و حرکت کی اطلاع پر فورسز نے کارروائی کی۔ فائرنگ کے تبادلے کے نتیجے میں مزید 2 دہشت گرد ہلاک ہوگئے۔

جاری بیان کے مطابق ہلاک ہونے والے دہشت گردوں کا تعلق فتنۃ الہندوستان سے بتایا گیا ہے، جبکہ ان کے قبضے سے اسلحہ اور گولہ بارود بھی برآمد ہوا۔

حکام کے مطابق دونوں علاقوں میں کلیئرنس آپریشنز جاری ہیں تاکہ ممکنہ طور پر موجود دیگر دہشت گردوں کا سراغ لگایا جاسکے۔ بیان میں کہا گیا ہے کہ دہشت گردی کے خاتمے کے لیے سیکیورٹی فورسز اور قانون نافذ کرنے والے اداروں کی کارروائیاں جاری رہیں گی۔