کمشنر لورالائی ڈویژن ولی محمد بڑیچ کا ٹیچنگ ہسپتال لورالائی کا تفصیلی دورہ، طبی سہولیات اور جاری اصلاحات کا جائزہ

لورالائی(میاں محمدعامربشیر آرائیں )کمشنر لورالائی ڈویژن ولی محمد بڑیچ نے ٹیچنگ ہسپتال لورالائی کا تفصیلی دورہ کیا، جہاں انہوں نے مختلف وارڈز، طبی شعبوں، تشخیصی مراکز، ادویات کی فراہمی اور ہسپتال میں مریضوں کو فراہم کی جانے والی سہولیات کا جائزہ لیا۔ اس موقع پر میڈیکل سپرنٹنڈنٹ ڈاکٹر نقیب اللہ نیازی، ڈسٹرکٹ ہیلتھ آفیسر ڈاکٹر فہیم خان اور ڈپٹی میڈیکل سپرنٹنڈنٹ ڈاکٹر زین اللہ کاکڑ بھی ان کے ہمراہ تھے۔دورے کے دوران کمشنر ولی محمد بڑیچ نے ہسپتال کے مختلف وارڈز، ڈاکٹروں کے معائنے کے کمروں، بیرونی مریضوں کے شعبے، طبی تجربہ گاہ، آپریشن تھیٹر، ایم آر آئی اور سی ٹی اسکین سینٹر سمیت ہسپتال میں قائم کنٹرول روم کا معائنہ کیا۔ انہوں نے ہسپتال میں پانی کی فراہمی کے لیے قائم بور کا بھی جائزہ لیا اور متعلقہ حکام سے اس حوالے سے معلومات حاصل کیں۔کمشنر نے ہسپتال میں جاری طبی سرگرمیوں، مریضوں کو علاج معالجے کی فراہمی اور مختلف شعبوں کی کارکردگی کا مشاہدہ کیا۔ اس موقع پر انہوں نے ہسپتال میں آنے والے مریضوں اور ان کے لواحقین سے بھی ملاقات کی اور انہیں فراہم کی جانے والی طبی سہولیات، علاج معالجے کے انتظامات اور ہسپتال میں متعارف کرائی گئی اصلاحات کے بارے میں دریافت کیا۔ انہوں نے ادویات کی فراہمی کے مرکز کا بھی جائزہ لیا اور مریضوں کو تجویز کردہ ادویات کی دستیابی اور فراہمی سے متعلق معلومات حاصل کیں۔اس موقع پر گفتگو کرتے ہوئے کمشنر لورالائی ڈویژن ولی محمد بڑیچ نے کہا کہ ٹیچنگ ہسپتال لورالائی محدود وسائل کے باوجود عوام کو طبی سہولیات فراہم کرنے کے لیے اہم کردار ادا کر رہا ہے۔ ہسپتال میں علاج معالجے کی سہولیات میں بہتری اور مختلف شعبوں کی فعالیت قابلِ اہمیت ہے، تاہم عوام کو مزید بہتر، معیاری اور بروقت طبی سہولیات کی فراہمی کے لیے مسلسل توجہ اور مؤثر اقدامات ضروری ہیں۔انہوں نے کہا کہ ٹیچنگ ہسپتال لورالائی نہ صرف ضلع لورالائی بلکہ پورے لورالائی ڈویژن اور ملحقہ اضلاع کے مریضوں کے لیے بھی ایک اہم طبی مرکز کی حیثیت رکھتا ہے۔ دور دراز علاقوں سے مریض علاج کی غرض سے یہاں آتے ہیں، اس لیے ہسپتال میں طبی سہولیات کی دستیابی، ڈاکٹروں اور طبی عملے کی خدمات، تشخیصی آلات کی فعالیت، ادویات کی فراہمی اور صاف پانی کے مناسب انتظام کو خصوصی اہمیت حاصل ہے۔
کمشنر نے اس امر پر زور دیا کہ ہسپتال میں جاری اصلاحات کے ثمرات براہِ راست عوام تک پہنچنے چاہئیں اور مریضوں کو علاج معالجے کے دوران غیر ضروری مشکلات کا سامنا نہیں ہونا چاہیے۔ انہوں نے ہسپتال کے انتظامی اور طبی امور کا جائزہ لیتے ہوئے متعلقہ حکام سے مختلف شعبوں کی کارکردگی اور دستیاب سہولیات کے بارے میں تبادلۂ خیال کیا۔انہوں نے مزید کہا کہ صحت عامہ کی بہتری حکومت کی اہم ذمہ داری ہے اور سرکاری ہسپتالوں میں عوام کو بہتر طبی سہولیات کی فراہمی کے لیے دستیاب وسائل کو مؤثر انداز میں استعمال کرنا وقت کی اہم ضرورت ہے۔ ٹیچنگ ہسپتال لورالائی کی اہمیت کے پیش نظر اس کے انتظامی امور، طبی خدمات اور بنیادی سہولیات پر خصوصی توجہ دی جانی چاہیے تاکہ لورالائی اور ملحقہ اضلاع کے عوام کو اپنے علاقے میں بہتر علاج معالجے کی سہولیات میسر آ سکیں۔دورے کے دوران ہسپتال انتظامیہ نے کمشنر لورالائی ڈویژن کو مختلف شعبوں کی کارکردگی، مریضوں کو فراہم کی جانے والی سہولیات اور ہسپتال میں جاری اصلاحاتی اقدامات کے حوالے سے آگاہ کیا۔ کمشنر کے اس دورے کا مقصد ہسپتال کی مجموعی صورتحال کا جائزہ لینا اور عوام کو فراہم کی جانے والی طبی سہولیات میں بہتری کے امکانات کا مشاہدہ کرنا تھا۔