گنداخہ شہر میں سیوریج سسٹم اور نکاسی آب کے مسائل حل کرنے کے لیے عملی اقدامات جاری ہیں، ڈاکٹر جاوید اختر جمالی

گنداخہ:( نامہ نگار فرید احمد) چیئرمین میونسپل کمیٹی گنداخہ ڈاکٹر جاوید اختر جمالی نے کہا ہے کہ محدود وسائل کے باوجود شہر کی تعمیر و ترقی، عوامی فلاح و بہبود اور شہریوں کو بنیادی سہولیات کی فراہمی ہماری اولین ترجیحات میں شامل ہیں۔ گنداخہ سٹی کے مختلف گلیوں اور محلوں میں سیوریج سسٹم کی بہتری اور نکاسی آب کے مسائل کے حل کے لیے کام جاری ہے، جس کی تکمیل سے شہریوں کو درپیش مشکلات میں کمی اور عوام کو براہِ راست ریلیف ملے گا۔
ان خیالات کا اظہار انہوں نے تحصیل پریس کلب گنداخہ کے چیئرمین فرید احمد قمبرانی سے ٹیلیفونک گفتگو کرتے ہوئے کیا۔ ڈاکٹر جاوید اختر جمالی نے کہا کہ شہریوں کے دیرینہ مسائل کا حل اور گنداخہ شہر کو صاف ستھرا، خوبصورت اور بہتر شہری سہولیات سے آراستہ بنانا ان کی ترجیحات میں شامل ہے۔ اس مقصد کے لیے میونسپل کمیٹی کے دستیاب وسائل کو بروئے کار لاتے ہوئے مختلف ترقیاتی کاموں پر توجہ دی جا رہی ہے۔انہوں نے کہا کہ شہر کے مختلف علاقوں میں سیوریج اور نکاسی آب کے نظام کو بہتر بنانے کے لیے اقدامات کیے جا رہے ہیں تاکہ شہریوں کو گلیوں اور محلوں میں درپیش مشکلات سے نجات دلائی جا سکے۔ صاف ستھرا ماحول نہ صرف شہریوں کی بنیادی ضرورت ہے بلکہ ایک صحت مند معاشرے کی تشکیل کے لیے بھی انتہائی ضروری ہے۔چیئرمین میونسپل کمیٹی گنداخہ نے مزید کہا کہ عوامی مسائل کے حل کے لیے دن رات کوشاں ہیں اور شہر کی بہتری کے لیے دستیاب وسائل کے مطابق ترقیاتی سرگرمیوں کا سلسلہ جاری رکھا جائے گا۔ انہوں نے اس عزم کا اظہار کیا کہ شہریوں کو بہتر سہولیات کی فراہمی، صفائی ستھرائی کے نظام میں بہتری اور نکاسی آب کے مسائل کے ازالے کے لیے ہر ممکن اقدامات کیے جائیں گے۔