میر رضا کیس کی انکوائری رپورٹ سے متعلق اہم پیشرفت

کراچی (ویب ڈیسک): میر رضا کی موت سے متعلق جوڈیشل کمیشن نے انکوائری رپورٹ تیار کرلی ہے، جو کل صبح 10 بجے سندھ حکومت کے حوالے کیے جانے کا امکان ہے۔ ذرائع کے مطابق کمیشن نے سیکریٹری داخلہ کو بھی طلب کرلیا ہے، جبکہ رجسٹرار جوڈیشل کمیشن رپورٹ ان کے حوالے کریں گے۔

میر رضا کی موت کے معاملے کی تحقیقات کے لیے قائم جوڈیشل کمیشن نے اپنی کارروائی مکمل کرنے کے بعد رپورٹ مرتب کی ہے۔ رپورٹ میں کیا سفارشات یا نتائج شامل ہیں، اس حوالے سے تاحال تفصیلات سامنے نہیں آئیں۔

کمیشن کی کارروائی کے دوران میر حسین علی خان، مریم حسین اور ایڈووکیٹ جبران ناصر سمیت مختلف شخصیات پیش ہوئیں۔ ایڈیشنل سیکریٹری جاوید احمد ابڑو، سی پی ایل سی کے گواہ کاشف افتخار، طٰہٰ پراچہ اور تفتیشی افسر ڈی ایس پی سراج لاشاری نے بھی کمیشن کے سامنے پیش ہوکر اپنا مؤقف پیش کیا۔

کارروائی کے دوران کاشف افتخار اور ڈی ایس پی سراج لاشاری کے بیانات قلمبند کیے گئے۔ دوسری جانب کے الیکٹرک کی نمائندہ رابعہ، مینجنگ ڈائریکٹر سید محمد طلحہ کی جانب سے کمیشن میں پیش ہوئیں اور ایک سیل شدہ لفافہ جمع کرایا، جسے ریکارڈ کا حصہ بنا لیا گیا۔

واضح رہے کہ جوڈیشل کمیشن نے اس سے قبل میر رضا کیس سے متعلق معلومات فراہم کرنے والوں کے لیے ایک لاکھ روپے انعام کی پیشکش کی تھی، تاہم کارروائی مکمل ہونے کے بعد یہ پیشکش واپس لے لی گئی۔

انکوائری رپورٹ سندھ حکومت کے حوالے کیے جانے کے بعد کیس سے متعلق کمیشن کے نتائج اور سفارشات سامنے آنے کی توقع ہے۔ تاہم رپورٹ کے مندرجات اور اس پر حکومت کے آئندہ اقدامات سے متعلق باضابطہ تفصیلات کا انتظار ہے۔