عوام کو بتایا جا رہا ہے کہ تمہاری کوئی حیثیت نہیں، سلمان اکرم راجا

لاہور: پاکستان تحریک انصاف کے سیکریٹری جنرل سلمان اکرم راجا نے کہا ہے کہ علیمہ خان کے ساتھ ہونے والے سلوک کے ذریعے عوام کو یہ پیغام دیا جا رہا ہے کہ ان کی کوئی حیثیت نہیں، جبکہ صرف کسی اندیشے کی بنیاد پر کسی کے بنیادی حقوق سلب کرنا انصاف کے تقاضوں کے مطابق نہیں۔

لاہور ہائیکورٹ میں میڈیا سے گفتگو کرتے ہوئے سلمان اکرم راجا نے کہا کہ علیمہ خان کی نظر بندی کو 9 روز گزر چکے ہیں اور ہم عدالتوں سے انصاف کی امید رکھتے ہیں۔

انہوں نے کہا کہ بانی پی ٹی آئی کے خاندان نے ایک مثال قائم کی ہے۔ ان کے مطابق بانی پی ٹی آئی نے محمود خان اچکزئی اور علامہ راجا ناصر عباس کو مذاکرات کا اختیار دیا ہے، تاہم انہیں علم نہیں کہ اس وقت بیک چینل پر کوئی رابطے یا مذاکرات جاری ہیں یا نہیں۔

دوسری جانب لاہور ہائیکورٹ میں علیمہ خان کو جیل میں ادویات اور کپڑوں کی فراہمی جبکہ اہلخانہ اور وکلا سے ملاقات کی اجازت دینے سے متعلق درخواست پر سماعت ہوئی۔

جسٹس ابرار گل نے علیمہ خان کے بیٹے شاہ ریز کی درخواست پر سماعت کی۔ درخواست گزار کی جانب سے وکیل رانا مدثر عمر عدالت میں پیش ہوئے۔

وکیل نے مؤقف اختیار کیا کہ ڈی سی لاہور کی جانب سے علیمہ خان کی نظر بندی کا نوٹیفکیشن جاری کیا گیا ہے اور انہیں جیل میں بنیادی سہولیات سے محروم رکھا جا رہا ہے۔

درخواست میں عدالت سے استدعا کی گئی کہ علیمہ خان کو جیل میں ادویات اور کپڑے فراہم کرنے کے ساتھ اہلخانہ اور وکلا سے ملاقات کی اجازت دینے کے احکامات جاری کیے جائیں۔

عدالت نے سپرنٹنڈنٹ جیل سے آج دوپہر 2 بجے تک رپورٹ طلب کرلی۔