محمود اچکزئی کی اختر مینگل سے ملاقات، ملکی و بلوچستان کی سیاسی صورتحال پر مشاورت

کراچی: تحریک تحفظ آئین پاکستان کے سربراہ اور قائد حزب اختلاف محمود خان اچکزئی نے بلوچستان نیشنل پارٹی کے سربراہ سردار اختر جان مینگل سے ان کی رہائش گاہ پر ملاقات کی۔

ملاقات میں بلوچستان سمیت ملک کی مجموعی سیاسی اور علاقائی صورتحال پر تفصیلی تبادلہ خیال کیا گیا، جبکہ آئندہ کے سیاسی لائحہ عمل اور باہمی مشاورت جاری رکھنے سے متعلق امور بھی زیر غور آئے۔

اس موقع پر 15 ستمبر کو اسلام آباد میں ہونے والے تحریک تحفظ آئین پاکستان کے سربراہی اجلاس کے حوالے سے بھی مشاورت کی گئی۔

ملاقات میں سندھ یونائٹڈ پارٹی کے سربراہ سید زین شاہ، تحریک تحفظ آئین پاکستان کے معاشی ترجمان محمد زبیر، بلوچستان نیشنل پارٹی کے رہنما ساجد ترین ایڈووکیٹ، تحریک کے ترجمان اخونزادہ حسین احمد یوسفزئی اور رہنما آغا حسن بلوچ بھی موجود تھے۔

ملاقات کے دوران سیاسی صورتحال اور مستقبل کے لائحہ عمل پر باہمی رابطے اور مشاورت کو مزید آگے بڑھانے پر بھی غور کیا گیا۔