تعلیم کے معیار پر کسی قسم کا سمجھوتہ نہیں کیا جائے گا، قرۃ العین مگسی

گنداواہ (نامہ نگار) ڈسٹرکٹ ایجوکیشن آفیسر جھل مگسی محترمہ قرۃ العین مگسی سے اساتذہ کرام، محکمہ تعلیم کے افسران، صحافی برادری سمیت مختلف شعبہ ہائے زندگی سے تعلق رکھنے والی شخصیات نے ملاقات کی۔ ملاقات کے دوران ضلع میں تعلیمی صورتحال، اسکولوں کی فعالیت اور اساتذہ کی کارکردگی سمیت مختلف امور پر تفصیلی تبادلہ خیال کیا گیا۔
اس موقع پر ڈسٹرکٹ ایجوکیشن آفیسر جھل مگسی محترمہ قرۃ العین مگسی نے کہا کہ تعلیم کے معیار پر کسی قسم کا سمجھوتہ نہیں کیا جائے گا۔ بند اسکولوں کو فعال بنانے اور تعلیمی سرگرمیوں کو مزید بہتر بنانے کے لیے اقدامات جاری ہیں۔ انہوں نے کہا کہ تمام اساتذہ اپنی جائے تعیناتی پر موجود رہ کر اپنی ذمہ داریاں احسن طریقے سے سرانجام دیں اور طلبہ کو معیاری تعلیم کی فراہمی یقینی بنائیں۔
انہوں نے مزید کہا کہ محکمہ تعلیم کی بہتری کے لیے افسران اور اساتذہ کو اپنی ذمہ داریاں ایمانداری اور لگن سے ادا کرنا ہوں گی، جبکہ تعلیمی اداروں میں نظم و ضبط اور تدریسی معیار کو ہر صورت برقرار رکھا جائے گا۔