جاپان سندھ میں سیلاب سے بچاؤ کیلیے 16.4 ملین ڈالر کی گرانٹ دے گا، معاہدے پر دستخط

اسلام آباد: پاکستان اور جاپان کے درمیان سندھ میں سیلاب سے بچاؤ کے بنیادی ڈھانچے کی بہتری کے لیے گرانٹ معاہدے پر دستخط ہوگئے۔

وزارت اقتصادی امور کے مطابق جاپان اس منصوبے کے لیے 2.58 ارب جاپانی ین، یعنی تقریباً 16.4 ملین ڈالر کی گرانٹ فراہم کرے گا۔ منصوبے کا مقصد سندھ میں سیلاب سے تحفظ کے بنیادی ڈھانچے کو مضبوط بنانا اور سیلاب سے متاثر ہونے والی آبادیوں کی قدرتی آفات سے نمٹنے کی صلاحیت بہتر بنانا ہے۔

منصوبے کے تحت لاڑکانہ میں دریائے سندھ کے دائیں کنارے واقع اولڈ آباد بند کو بہتر اور مضبوط کیا جائے گا، جس سے سیلابی خطرات سے نمٹنے میں مدد ملے گی۔

معاہدے پر سیکریٹری اقتصادی امور محمد حمیر کریم، جاپانی سفیر اکاماتسو شوئچی، ایڈیشنل سیکریٹری اقتصادی امور سبینہ قریشی اور جائیکا کے سینئر نمائندے سوگاوارا تاکایوکی نے دستخط کیے۔

اس موقع پر سیکریٹری اقتصادی امور نے جاپان کی مسلسل ترقیاتی معاونت کو سراہا، جبکہ جاپانی سفیر نے پاکستان اور جاپان کے درمیان دوستانہ تعلقات اور دوطرفہ تعاون مزید مضبوط بنانے کے عزم کا اظہار کیا۔