میر رضا قتل کے بعد کون پُراسرار طور پر غائب ہے؟ والد کی میڈیا سے گفتگو

کراچی: میر رضا قتل کیس میں مقتول کے والد حسین نے تحقیقات پر سوالات اٹھاتے ہوئے کہا ہے کہ گیسٹ ہاؤس کے ملازمین سے کی گئی تفتیش اور سی سی ٹی وی ریکارڈ کے بارے میں اہلِ خانہ کو آگاہ نہیں کیا جا رہا۔

میڈیا سے گفتگو کرتے ہوئے حسین نے بتایا کہ وزیر داخلہ اور میئر کراچی نے ملاقات کے دوران جوڈیشل کمیشن بنانے کی تجویز دی، جس پر خاندان نے سوچ کر جواب دینے کا کہا ہے۔

انہوں نے کہا کہ نئی تحقیقاتی کمیٹی پر اعتماد ہے اور امید ہے کہ کمیٹی حقائق سامنے لائے گی۔ ان کا کہنا تھا کہ ڈی آئی جی عامر فاروقی ایک اچھی شہرت رکھنے والے افسر ہیں۔

مقتول کے والد نے مزید کہا کہ میر رضا کا بزنس پارٹنر بھی پراسرار طور پر غائب ہے، جبکہ پولیس نے اس سے ایک بار تفتیش کی۔ انہوں نے سوال اٹھایا کہ گلستانِ جوہر میں قائم گیسٹ ہاؤس کے ملازمین سے کیا تحقیقات ہوئیں، اس بارے میں خاندان کو کچھ نہیں بتایا جا رہا۔

انہوں نے مطالبہ کیا کہ گیسٹ ہاؤس کی سی سی ٹی وی فوٹیج اور تحقیقات سے متعلق تمام اہم معلومات سامنے لائی جائیں تاکہ اصل حقائق واضح ہو سکیں۔