سیکیورٹی فورسز کی پختونخوا اور بلوچستان میں کارروائیاں، 32 دہشت گرد ہلاک

اسلام آباد: سیکیورٹی فورسز نے خیبر پختونخوا اور بلوچستان میں فتنۃ الخوارج اور فتنۃ الہندوستان کے خلاف کارروائیاں کرتے ہوئے 32 دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے دہشت گرد نیٹ ورکس کے خلاف خفیہ اطلاعات کی بنیاد پر مشترکہ آپریشنز کیے، جن میں گزشتہ 24 گھنٹوں کے دوران بڑی کامیابیاں حاصل ہوئیں۔

آئی ایس پی آر کے مطابق ضلع خیبر میں 28 اور 29 جولائی کی درمیانی شب انٹیلی جنس بیسڈ آپریشنز کیے گئے، جن کے دوران فتنۃ الخوارج سے تعلق رکھنے والے 24 دہشت گرد مارے گئے۔

دوسری جانب بلوچستان کے ضلع نوشکی میں بھی سیکیورٹی فورسز نے کارروائیاں کیں، جہاں شدید فائرنگ کے تبادلے میں فتنۃ الہندوستان سے تعلق رکھنے والے 8 دہشت گرد ہلاک ہوئے۔

ترجمان پاک فوج کے مطابق کارروائیوں کے دوران دہشت گردوں کے قبضے سے اسلحہ، گولہ بارود اور دیسی ساختہ دھماکا خیز مواد (آئی ای ڈیز) برآمد کرکے تباہ کر دیا گیا، جبکہ مزید دہشت گردوں اور ان کے سہولت کاروں کے خاتمے کے لیے کلیئرنس آپریشن جاری ہے۔

آئی ایس پی آر کا کہنا ہے کہ نیشنل ایکشن پلان اور عزمِ استحکام کے وژن کے تحت سیکیورٹی فورسز اور قانون نافذ کرنے والے ادارے ملک میں دہشت گردی کے خاتمے کے لیے کارروائیاں جاری رکھیں گے۔