پاکستان آئل ریفائننگ پالیسی 2023 میں مجوزہ ترامیم کی منظوری دے دی گئی

اسلام آباد: وزیراعظم محمد شہباز شریف کی زیر صدارت کابینہ کمیٹی برائے توانائی کے اجلاس میں پاکستان آئل ریفائننگ پالیسی 2023 میں مجوزہ ترامیم کی منظوری دے دی گئی۔

اجلاس میں وزیراعظم نے کہا کہ آئل ریفائنریز کی اپ گریڈیشن وقت کی اہم ضرورت ہے اور یہ پاکستان کے توانائی تحفظ کے نظام کا اہم حصہ ہے۔ جدید تقاضوں سے ہم آہنگ ریفائنریز سے نہ صرف توانائی کی ضروریات بہتر انداز میں پوری ہوں گی بلکہ درآمدی ایندھن پر انحصار بھی کم ہوگا۔

وزیراعظم کو بریفنگ میں بتایا گیا کہ موجودہ ریفائنریز کی استعداد بڑھانے کے لیے اپ گریڈیشن ضروری ہے، جبکہ یورو-4 اور یورو-5 معیار کے ایندھن کی پیداوار سے ماحولیاتی آلودگی میں کمی اور بہتر معیار کا ایندھن فراہم کرنے میں مدد ملے گی۔

وزیراعظم نے اوگرا میں اصلاحات لانے، توانائی شعبے میں شفافیت، مسابقت اور سرمایہ کاری کے فروغ کے لیے اقدامات تیز کرنے کی ہدایت کی۔ انہوں نے نئی پالیسی پر بروقت عملدرآمد یقینی بنانے اور تاخیر برداشت نہ کرنے کا بھی کہا۔

اجلاس میں براؤن فیلڈ ریفائنریز سے متعلق ترامیم کے فروغ کے لیے قطر، سعودی عرب اور دیگر خلیجی ممالک میں روڈ شوز منعقد کرنے کی ہدایت بھی دی گئی۔

حکام کے مطابق پالیسی میں ترامیم کا مقصد ماحول دوست یورو-V معیار کے پٹرول اور ڈیزل کی پیداوار بڑھانا، کم معیار کی پیٹرولیم مصنوعات اور فرنس آئل کے استعمال میں کمی لانا ہے۔

وزیراعظم نے ملک میں پیٹرولیم مصنوعات کے اسٹریٹجک ذخائر بڑھانے کی ہدایت بھی جاری کی۔