سونے اور چاندی کی عالمی و مقامی مارکیٹوں میں آج پھر قیمتیں بڑھ گئیں

کراچی: عالمی اور مقامی صرافہ مارکیٹوں میں سونے اور چاندی کی قیمتوں میں مسلسل اضافے کا سلسلہ جاری ہے، جہاں آج بھی سونے کی قیمت میں نمایاں اضافہ ریکارڈ کیا گیا۔

بین الاقوامی بلین مارکیٹ میں سونے کی فی اونس قیمت 46 ڈالر اضافے کے بعد 4 ہزار 114 ڈالر کی سطح پر پہنچ گئی۔

عالمی مارکیٹ میں اضافے کے اثرات مقامی صرافہ بازاروں پر بھی پڑے، جہاں 24 قیراط فی تولہ سونے کی قیمت میں 4 ہزار 600 روپے اضافہ ہوا، جس کے بعد نئی قیمت 4 لاکھ 33 ہزار 836 روپے ہوگئی۔

اسی طرح 10 گرام سونے کی قیمت میں 3 ہزار 944 روپے کا اضافہ ریکارڈ کیا گیا، جس کے بعد قیمت 3 لاکھ 71 ہزار 944 روپے تک پہنچ گئی۔

سونے کے ساتھ چاندی کی قیمتوں میں بھی اضافہ ہوا، فی تولہ چاندی 7 روپے اضافے کے بعد 6 ہزار 403 روپے جبکہ 10 گرام چاندی 5 ہزار 489 روپے کی سطح پر پہنچ گئی۔