پی ٹی آئی کا جوڈیشل کمیشن اجلاس کے بائیکاٹ کا فیصلہ، بیرسٹر علی ظفر کا اختلاف

اسلام آباد: پاکستان تحریک انصاف (پی ٹی آئی) نے اسلام آباد ہائی کورٹ اور سندھ ہائی کورٹ میں ایڈیشنل ججز کی تعیناتی سے متعلق جوڈیشل کمیشن کے اجلاس میں شرکت نہ کرنے کا فیصلہ کرلیا، تاہم پارٹی رہنما سینیٹر علی ظفر نے اس فیصلے سے اختلاف کا اظہار کیا ہے۔

سپریم کورٹ کے باہر میڈیا سے گفتگو کرتے ہوئے سینیٹر علی ظفر نے کہا کہ انہیں گزشتہ رات بیرسٹر گوہر کی جانب سے آگاہ کیا گیا کہ پارٹی نے جوڈیشل کمیشن کے اجلاس میں شرکت نہ کرنے کا فیصلہ کیا ہے۔

علی ظفر کا کہنا تھا کہ ان کی ذاتی رائے میں کسی بھی آئینی ادارے کا بائیکاٹ نہیں کرنا چاہیے، تاہم یہ پارٹی کا فیصلہ ہے اور وہ اس کا احترام کرتے ہیں۔

انہوں نے مزید کہا کہ بانی پی ٹی آئی کی بہن نورین بی بی کے بیان سے پاکستان تحریک انصاف کا کوئی تعلق نہیں ہے۔