سانحۂ زیارت، آج 17 جولائی کو کوئٹہ میں مکمل شٹر ڈاؤن ہڑتال ہوگی، کاشف حیدری

شہداء کے لواحقین کے مطالبات انصاف، امن اور عوام کے تحفظ سے متعلق ہیں، انہیں نظرانداز نہیں کیا جا سکتا، متاثرہ خاندانوں کے جائز مطالبات فوری تسلیم کیے جائیں، ترجمان
جمعہ کو کوئٹہ بھر میں مکمل شٹر ڈاؤن ہڑتال ہوگی، تمام چھوٹے بڑے کاروباری مراکز، مارکیٹیں اور تجارتی سرگرمیاں مکمل طور پر بند رہیں گی، تاجر برادری ہڑتال کو کامیاب بنائے، بیان
کوئٹہ ( ) مرکزی تنظیم تاجران بلوچستان کے ترجمان کاشف حیدری نے کہا ہے کہ سانحۂ زیارت کے شہداء کے لواحقین سے اظہارِ یکجہتی اور دھرنا کمیٹی کے جائز مطالبات کے حق میں 17 جولائی بروز جمعہ کو کوئٹہ میں مکمل شٹر ڈاؤن ہڑتال کی جائے گی، جس کے دوران تمام چھوٹے بڑے کاروباری مراکز، مارکیٹیں اور تجارتی سرگرمیاں مکمل طور پر بند رہیں گی۔ یہ بات انہوں نے اپنے جاری کردہ بیان میں کہی۔ انہوں نے کہا کہ سانحۂ زیارت نے پورے بلوچستان کو غمزدہ کر دیا ہے، جبکہ شہداء کے لواحقین کے مطالبات انصاف، امن اور عوام کے تحفظ سے متعلق ہیں، جنہیں نظرانداز نہیں کیا جا سکتا۔ انہوں نے مطالبہ کیا کہ زیارت سمیت بلوچستان بھر میں پائیدار امن قائم کیا جائے، شہریوں اور سیکیورٹی اہلکاروں کے جان و مال کا تحفظ یقینی بنایا جائے اور سانحے کے ذمہ دار عناصر کو قانون کے کٹہرے میں لا کر متاثرہ خاندانوں کو فوری انصاف فراہم کیا جائے۔ کاشف حیدری نے بلوچستان بھر کی تاجر برادری سے اپیل کی کہ وہ 17 جولائی کو مکمل شٹر ڈاؤن ہڑتال میں بھرپور انداز میں شریک ہو کر اپنے کاروباری مراکز بند رکھیں اور شہداء کے لواحقین کے ساتھ یکجہتی، امن کے قیام اور بلوچستان کے عوام کے جائز مطالبات کی حمایت کا عملی ثبوت دیں۔