شہر کو صاف ستھرا بنانے کیلئے تمام وسائل بروئے کار لائے جا رہے ہیں، سکندر علی تنیہ

گنداخہ:( نامہ نگار فریداحمد) میئر میونسپل کارپوریشن اوستہ محمد میر مظفر خان جمالی کی خصوصی ہدایات پر چیف آفیسر میونسپل کارپوریشن اوستا محمد سکندر علی تنیہ نے سروسنگ اور مرمت کے بعد میونسپل کارپوریشن کی صفائی مشینری کا تفصیلی معائنہ کیا۔ اس موقع پر انہوں نے مشینری کی کارکردگی، فنی حالت اور آپریشنل استعداد کا جائزہ لیتے ہوئے متعلقہ عملے کو ہدایت کی کہ تمام فعال مشینری کو فوری طور پر شہر کے مختلف علاقوں میں صفائی ستھرائی، گندگی کے خاتمے اور کچرے کی بروقت منتقلی کے لیے استعمال میں لایا جائے تاکہ شہریوں کو صاف، ستھرا اور صحت مند ماحول فراہم کیا جا سکے۔چیف آفیسر سکندر علی تنیہ نے کہا کہ میئر میر مظفر خان جمالی کے وژن کے مطابق شہر میں صفائی کے نظام کو جدید خطوط پر استوار کرنے اور بلدیاتی خدمات کے معیار کو مزید بہتر بنانے کے لیے تمام دستیاب وسائل بروئے کار لائے جا رہے ہیں۔ انہوں نے کہا کہ صفائی مشینری کی بروقت مرمت، سروسنگ اور مسلسل دیکھ بھال سے نہ صرف صفائی مہم کی رفتار میں اضافہ ہوگا بلکہ شہر کے تمام علاقوں میں مؤثر انداز میں صفائی کو یقینی بنایا جا سکے گا۔انہوں نے متعلقہ عملے کو ہدایت کی کہ صفائی کے دوران غفلت یا لاپرواہی ہرگز برداشت نہیں کی جائے گی اور تمام اہلکار اپنی ذمہ داریاں پوری ایمانداری، ذمہ داری اور مستعدی کے ساتھ انجام دیں۔ انہوں نے کہا کہ عوام کو بہترین بلدیاتی سہولیات کی فراہمی، صاف ماحول کی یقینی دستیابی اور شہر کو خوبصورت بنانا میونسپل کارپوریشن کی اولین ترجیحات میں شامل ہے، جس کے لیے صفائی مہم مزید مؤثر انداز میں جاری رکھی جائے گی۔