کوئٹہ سوشل میڈیا پر مبینہ توہین آمیز مواد کی اشاعت پر مرکزی ملزم گرفتار ، مقدمہ درج

نیشنل سائبر کرائم انویسٹی گیشن ایجنسی (NCCIA) بلوچستان نے کوئٹہ پولیس کے تعاون سے کارروائی کرتے ہوئے مبینہ توہین آمیز سوشل میڈیا مواد کی اشاعت سے متعلق مقدمے کے مرکزی ملزم آغا رضا کو کوئٹہ سے گرفتار کر لیا ہے۔ این سی سی آئی اے کے ترجمان کے مطابق واقعے کا مقدمہ پہلے ہی درج کیا جا چکا ہے اور اس حوالے سے تحقیقات قانون کے مطابق جاری ہیں۔
ترجمان کا کہنا تھا کہ مذہبی جذبات مجروح کرنے، نفرت انگیز ڈیجیٹل مواد پھیلانے، عوامی امن خراب کرنے یا فرقہ وارانہ کشیدگی پیدا کرنے کے لیے سوشل میڈیا کے مبینہ غلط استعمال کو کسی صورت برداشت نہیں کیا جائے گا۔ انہوں نے واضح کیا کہ ایسے واقعات میں ملوث افراد کے خلاف بلاامتیاز قانونی کارروائی عمل میں لائی جائے گی۔
این سی سی آئی اے نے عوام سے اپیل کی ہے کہ زیرِ تفتیش کیس سے متعلق مبینہ قابلِ اعتراض مواد کو شیئر، فارورڈ، اپ لوڈ یا اس پر تبصرہ کرنے سے گریز کریں، کیونکہ ایسے مواد کی مزید تشہیر متعلقہ قوانین کے تحت الگ جرم تصور کی جا سکتی ہے۔ ادارے نے مذہبی رہنماؤں، قبائلی عمائدین، میڈیا نمائندوں، سول سوسائٹی اور شہریوں پر زور دیا ہے کہ وہ امن، تحمل اور بین المذاہب ہم آہنگی کے فروغ میں اپنا کردار ادا کریں اور کسی بھی فرد یا گروہ کو قانون اپنے ہاتھ میں لینے کی اجازت نہ دیں۔
ترجمان کے مطابق ریاست اس معاملے کا نوٹس لے چکی ہے اور قانون کے مطابق کارروائی جاری ہے۔ این سی سی آئی اے بلوچستان نے بروقت تعاون پر کوئٹہ پولیس کا شکریہ ادا کرتے ہوئے اس بات کی یقین دہانی کرائی ہے کہ کیس کے تمام پہلوؤں کی پیشہ ورانہ، غیر جانبدارانہ اور منصفانہ تحقیقات کی جائیں گی