صوبائی وزیر صادق عمرانی کا دانہ سر حادثے پر اظہار افسوس

کوئٹہ(خ ن )بلوچستان کے سینئر صوبائی وزیر، پاکستان پیپلز پارٹی کے سینٹرل کمیٹی کے رکن، پارلیمانی لیڈر اور صوبائی وزیر آبپاشی میر محمد صادق عمرانی نے بلوچستان اور خیبر پختونخوا کے سرحدی علاقے دانہ سر میں مسافر بس کے المناک حادثے پر گہرے دکھ اور افسوس کا اظہار کیا ہے۔ اپنے بیان میں صوبائی وزیر نے کہا کہ اس حادثے میں 40 افراد کے جاں بحق ہونے کا واقعہ واقعی ایک بڑا سانحہ ہے۔ میر محمد صادق عمرانی نے کہا کہ تیز رفتاری، اوور لوڈنگ اور بے احتیاطی کے باعث ایسے خطرناک حادثات رونما ہوتے ہیں۔ لہٰذا ڈرائیور حضرات گاڑیوں کی بروقت مرمت کو یقینی بنائیں اور ٹریفک قوانین کے مطابق گاڑی چلائیں تاکہ محفوظ سفر کے ذریعے خود کو اور مسافروں کو ہر قسم کے حادثات سے بچایا جا سکے۔صوبائی وزیر نے کہا کہ وزیر اعلیٰ بلوچستان کی ہدایت پر ریسکیو ٹیموں نے بروقت کارروائی کی ہے۔ انہوں نے جاں بحق افراد کے درجات کی بلندی کے لیے دعا کرتے ہوئے کہا کہ اللہ تعالیٰ مرحومین کو جنت الفردوس میں جگہ عطا فرمائے اور لواحقین کو صبرِ جمیل عطا کرے۔ انہوں نے زخمیوں کی جلد صحتیابی کے لیے بھی دعا کی