ڈاکٹر ماہ نور کے علاج میں اہم پیشرفت

کراچی: تیزاب گردی کا نشانہ بننے والی کوئٹہ کی لیڈی ڈاکٹر ماہ نور کے علاج کے حوالے سے اہم پیشرفت سامنے آئی ہے، جہاں کراچی کے ایک نجی اسپتال میں ان کا علاج بدستور جاری ہے۔

اسپتال ذرائع کے مطابق ڈاکٹر ماہ نور کے چہرے، آنکھوں کے بیرونی حصے، ناک اور ہونٹوں پر موجود زخموں کا علاج کیا جا رہا ہے، جبکہ ان کی صحت کی صورتحال پر ماہر ڈاکٹروں کی ٹیم مسلسل نظر رکھے ہوئے ہے۔

ذرائع کے مطابق سندھ اور بلوچستان حکومتیں متاثرہ ڈاکٹر اور ان کے اہل خانہ سے مسلسل رابطے میں ہیں، جبکہ ڈاکٹر ماہ نور کی فیملی علاج کے عمل اور فراہم کی جانے والی طبی سہولیات پر اطمینان کا اظہار کر رہی ہے۔

اسپتال انتظامیہ کے مطابق پلاسٹک سرجنز اور آئی اسپیشلسٹس پر مشتمل ٹیم نے ڈاکٹر ماہ نور کا تفصیلی معائنہ کیا ہے۔ چہرے کے متاثرہ حصوں پر معمولی گرافٹنگ کی گئی ہے، تاہم کسی بڑی سرجری کی ضرورت پیش نہیں آئی اور نہ ہی فی الحال ایسی کوئی منصوبہ بندی کی گئی ہے۔

ذرائع کا کہنا ہے کہ پلاسٹک سرجنز معمول کے مطابق ضرورت کے تحت گرافٹنگ کا عمل جاری رکھیں گے تاکہ زخموں کی بحالی بہتر انداز میں ممکن ہو سکے۔ گزشتہ روز بھی ماہر ڈاکٹروں نے تیسری مرتبہ ڈاکٹر ماہ نور کا مکمل طبی معائنہ کیا، جس میں پلاسٹک سرجری اور آنکھوں کے امراض کے ماہرین شامل تھے۔

طبی ماہرین کے مطابق علاج کا عمل تسلسل کے ساتھ جاری ہے اور مریضہ کی حالت پر مسلسل نظر رکھی جا رہی ہے۔