والدین بچوں کو پولیو قطرے ضرور پلائیں، ڈپٹی کمشنر کوئٹہ کی اپیل

ڈپٹی کمشنر کوئٹہ مہراللہ بادینی نے بچوں کو پولیو کے قطرے پلا کر 13 اپریل سے شروع ہونے والی انسدادِ پولیو مہم کا باقاعدہ افتتاح کر دیا۔
اس موقع پر ڈپٹی کمشنر کوئٹہ کی زیر صدارت پولیو مہم کی سیکیورٹی اور دیگر انتظامی تیاریوں کے حوالے سے ایک اہم اجلاس بھی منعقد ہوا، جس میں متعلقہ حکام نے شرکت کی۔ اجلاس میں 13 اپریل سے شروع ہونے والی پولیو مہم کے حوالے سے تفصیلی بریفنگ دی گئی۔
بریفنگ کے مطابق اس مہم کے دوران 4 لاکھ سے زائد بچوں کو پولیو کے قطرے پلائے جائیں گے۔ مہم میں 1620 ٹیمیں حصہ لیں گی، جبکہ 445 سپروائزر ان ٹیموں کی نگرانی کریں گے۔ سیکیورٹی کے مؤثر انتظامات کے تحت 1620 سیکیورٹی اہلکار بھی ڈیوٹی سرانجام دیں گے۔
ڈپٹی کمشنر کوئٹہ مہراللہ بادینی نے والدین، علما کرام اور علاقے کے معززین سے اپیل کی ہے کہ وہ اپنے بچوں کو پولیو کے قطرے ضرور پلوائیں تاکہ اس موذی مرض کا مکمل خاتمہ ممکن بنایا جا سکے۔