پاکستان اور چین کا صحت، زراعت اور معدنیات میں اے آئی تعاون مضبوط بنانے پر اتفاق

پاکستان اور چین نے صحت، زراعت اور معدنیات کے شعبوں میں مصنوعی ذہانت (اے آئی) پر مبنی تعاون کو مزید مضبوط بنانے پر اتفاق کیا ہے، جس سے تحقیق، جدت اور معاشی ترقی کو نئی رفتار ملنے کی توقع ہے۔

ایس آئی ایف سی کی مؤثر حکمتِ عملی کے تحت پاکستان جدید ٹیکنالوجی خصوصاً اے آئی کے استعمال کو فروغ دے رہا ہے، تاکہ مختلف شعبہ جات میں ترقی اور باہمی تعاون کو وسعت دی جا سکے۔

دونوں ممالک نے زراعت، میڈیکل اے آئی، معدنیات اور بایوٹیکنالوجی کے میدان میں شراکت داری بڑھانے پر زور دیا ہے۔ ماہرین کے مطابق یہ تعاون تکنیکی جدت اور طبی تحقیق کے ذریعے صحت کے مسائل کے حل میں اہم کردار ادا کرے گا۔

پاکستان اور چین اسمارٹ اور ڈیجیٹل زراعت کے فروغ کے لیے مشترکہ اے آئی لیبارٹری کے قیام پر بھی کام کر رہے ہیں، جس کا مقصد زرعی پیداوار، سپلائی چین اور غذائی تحفظ کو بہتر بنانا ہے۔

حال ہی میں منعقدہ پاک چین بی ٹو بی ایگریکلچر انویسٹمنٹ کانفرنس میں تقریباً 80 مفاہمتی یادداشتوں پر دستخط کیے گئے جبکہ 4.5 ارب ڈالر کے معاہدے بھی طے پائے۔

چینی ماہرین کا کہنا ہے کہ پاکستان قدرتی معدنی وسائل سے مالا مال ہے جبکہ چین کے پاس جدید کان کنی کی ٹیکنالوجی موجود ہے، اور دونوں کی شراکت داری اس شعبے میں نمایاں کامیابی لا سکتی ہے۔

ایس آئی ایف سی پاکستان میں زراعت، صحت اور معدنیات کے شعبوں میں بین الاقوامی تعاون کے فروغ میں کلیدی کردار ادا کر رہی ہے۔