ٹرانسپورٹرز مسائل کے دلدل میں پھنس چکے ہیں، وزیر خان کاکڑ

کوئٹہ پنجاب روٹ پر ٹائم شیڈول، امن و امان کی صورتحال اور چیک پوسٹوں پر گھنٹوں تلاشی کے باعث ٹرانسپورٹ کا شعبہ شدید متاثر ہو رہا ہے، مسافروں اور ٹرانسپورٹرز کو مشکلات کا سامنا ہے، بس یونین رہنما

کوئٹہ (میاں محمد عامر بشیر آرائیں) آل پاکستان بس یونین اور پنجاب خیبرپختونخوا بس یونین کے مرکزی سیکرٹری اطلاعات ظاہر شاہ کاکڑ، نائب صدر اقبال سرگڑھ، جنرل سیکرٹری وزیر خان کاکڑ اور ڈپٹی جنرل سیکرٹری عبدالمتین نے اپنے مشترکہ اخباری بیان میں کہا ہے کہ بلوچستان میں ٹرانسپورٹرز مختلف مسائل کے دلدل میں پھنس چکے ہیں اور ٹرانسپورٹ کا کاروبار دن بدن مشکل ہوتا جا رہا ہے۔ خصوصاً کوئٹہ سے پنجاب اور خیبرپختونخوا کے مختلف شہروں تک چلنے والی مسافر گاڑیوں کو ٹائم شیڈول، امن و امان کی صورتحال اور راستے میں قائم چیک پوسٹوں پر طویل انتظار جیسے مسائل کا سامنا ہے۔انہوں نے کہا کہ مسافر گاڑیوں کو مختلف چیک پوسٹوں پر تلاشی کے نام پر گھنٹوں روکنے سے ٹرانسپورٹ کا نظام بری طرح متاثر ہو رہا ہے۔ گاڑیوں کی آمدورفت میں تاخیر کے باعث مقررہ ٹائم شیڈول برقرار رکھنا مشکل ہو جاتا ہے، جبکہ مسافروں کو بھی شدید پریشانی اور مشکلات کا سامنا کرنا پڑتا ہے۔ بالخصوص خواتین، بچوں، بزرگوں اور مریضوں کے لیے طویل انتظار انتہائی تکلیف دہ ثابت ہوتا ہے۔
رہنماؤں نے کہا کہ ٹرانسپورٹرز پہلے ہی بڑھتے ہوئے کاروباری اخراجات اور دیگر مشکلات سے دوچار ہیں، ایسے میں چیک پوسٹوں پر غیرضروری تاخیر ان کے مسائل میں مزید اضافہ کر رہی ہے۔ ٹرانسپورٹ کا شعبہ عوام کو سفری سہولیات فراہم کرنے کے ساتھ ہزاروں افراد کے روزگار کا ذریعہ بھی ہے، لہٰذا اس شعبے کو درپیش مشکلات کا فوری حل ضروری ہے۔انہوں نے کہا کہ امن و امان کا قیام اور مسافروں کی جان و مال کا تحفظ حکومت اور متعلقہ اداروں کی ذمہ داری ہے، تاہم سکیورٹی اقدامات کے دوران ایسا مؤثر نظام وضع کیا جانا چاہیے جس کے تحت ضروری جانچ پڑتال بھی یقینی بنائی جائے اور مسافر گاڑیوں کو بلاوجہ طویل وقت تک نہ روکا جائے۔ چیک پوسٹوں پر تلاشی اور جانچ پڑتال کا عمل تیز اور منظم بنانے سے مسافروں کی مشکلات میں کمی لائی جا سکتی ہے۔
آل پاکستان بس یونین اور پنجاب خیبرپختونخوا بس یونین کے رہنماؤں نے حکومت بلوچستان، وفاقی حکومت اور متعلقہ سکیورٹی و انتظامی حکام سے مطالبہ کیا کہ کوئٹہ پنجاب روٹ پر ٹرانسپورٹرز کو درپیش مسائل کے حل کے لیے فوری اقدامات کیے جائیں، ٹائم شیڈول سے متعلق مشکلات دور کی جائیں، امن و امان کی صورتحال بہتر بنائی جائے اور چیک پوسٹوں پر مسافر گاڑیوں کی جانچ پڑتال کے عمل کو سہل اور تیز کیا جائے۔انہوں نے کہا کہ ٹرانسپورٹرز کو سازگار ماحول فراہم کرنا وقت کی اہم ضرورت ہے تاکہ ٹرانسپورٹ کا شعبہ بہتر انداز میں اپنی سرگرمیاں جاری رکھ سکے اور عوام کو محفوظ، بروقت اور معیاری سفری سہولیات میسر آ سکیں۔