بلوچستان کی تعمیر و ترقی اور عوام کے روشن مستقبل پر کوئی سمجھوتہ نہیں کیا جائے گا ، وزیراعلیٰ بلوچستان

کوئٹہ: گوادر میں سکیورٹی فورسز نے دہشت گردوں کی خوفناک کارروائی کو مستعدی اور پیشہ ورانہ مہارت سے ناکام بناتے ہوئے 7 دہشت گردوں کو ہلاک کر دیا ہے۔ اس شاندار کامیابی پر وزیر اعلیٰ بلوچستان میر سرفراز بگٹی نے سکیورٹی فورسز کی جرأت، عزم اور بروقت کارروائی کو زبردست الفاظ میں سراہا ہے۔

وزیر اعلیٰ بلوچستان نے واضح کیا ہے کہ فتنہ الہندوستان کے دہشت گرد بلوچستان کے امن، استحکام اور ترقی کو نقصان پہنچانے میں کبھی کامیاب نہیں ہو سکتے۔ انہوں نے کہا کہ بلوچستان میں بدامنی پھیلانے اور ترقی کا راستہ روکنے کی تمام کوششیں ناکام بنا دی جائیں گی، اور دہشت گردی کے ذریعے عوام کو خوفزدہ کرنے والے عناصر اپنے مذموم مقاصد میں منہ کی کھائیں گے۔ میر سرفراز بگٹی کا کہنا تھا کہ صوبے کی تعمیر و ترقی اور عوام کے روشن مستقبل پر کسی قسم کا سمجھوتہ نہیں کیا جائے گا، قوم کو اپنے بہادر جوانوں پر فخر ہے جن کی قربانیاں قومی تاریخ کا قابل فخر باب ہیں۔ حکومتِ بلوچستان عوام کے جان و مال کے تحفظ اور پائیدار امن کے قیام کے لیے پوری طرح پرعزم ہے، اور امن دشمن عناصر و ان کے سہولت کاروں کے خلاف کارروائیاں بلا تعطل جاری رہیں گی۔