خبر: فیلڈ مارشل عاصم منیر اہم دورے پر تہران پہنچ گئے، ایران امریکا کشیدگی پر بات چیت متوقع

تہران (ویب ڈیسک) فیلڈ مارشل سید عاصم منیر ایران کے اہم دورے پر دارالحکومت تہران پہنچ گئے ہیں۔ دورے کا ایک اہم مقصد ایران اور امریکا کے درمیان کشیدگی کم کرنے کے لیے پاکستان کی سفارتی کوششوں پر بات چیت کرنا بتایا جا رہا ہے۔

رائٹرز نے ایرانی میڈیا کے حوالے سے رپورٹ کیا ہے کہ پاکستانی فوج کے سربراہ اس دورے کے دوران ایرانی اعلیٰ عسکری اور سیاسی قیادت سے ملاقاتیں کریں گے۔ ملاقاتوں میں دوطرفہ تعلقات، دفاعی تعاون، سرحدی انتظامات اور خطے کی سکیورٹی صورتحال پر تبادلۂ خیال متوقع ہے۔

دورے کے دوران ایران اور امریکا کے درمیان تناؤ کم کرنے میں پاکستان کے ممکنہ ثالثی کردار پر بھی گفتگو متوقع ہے۔ یہ دورہ ایسے وقت میں ہو رہا ہے جب خطے میں کشیدگی کے باعث سفارتی رابطوں کو اہمیت حاصل ہے۔