ایف بی آر نے اسٹیل یونٹس کی بجلی پر 5 روپے فی یونٹ سیلز ٹیکس کا اطلاق کر دیا

اسلام آباد (ویب ڈیسک): فیڈرل بورڈ آف ریونیو (ایف بی آر) نے مزید اسٹیل مینوفیکچررز، میلٹرز، ری رولرز اور کمپوزٹ یونٹس کی استعمال ہونے والی بجلی پر 5 روپے فی یونٹ سیلز ٹیکس عائد کردیا ہے۔

ایف بی آر نے اس حوالے سے سیلز ٹیکس جنرل آرڈر نمبر 16 آف 2026 میں ترمیم کرتے ہوئے مزید 3 اداروں کو اہل اسٹیل یونٹس کی فہرست میں شامل کرلیا ہے۔

6 اگست 2026 کے جنرل آرڈر میں ترمیم کے تحت شامل کیے گئے اداروں میں کے بی انٹرپرائزز، جی ایم بی اسٹیل فرنس اور راجپوت اسٹیل انڈسٹری شامل ہیں۔

ایف بی آر کے مطابق ان اداروں کی اہلیت کا تعین ایس آر او 1245(1)/2026 میں مقرر کردہ معیار کے تحت کیا گیا ہے، جس میں اسٹیل مصنوعات کی تیاری کے لیے استعمال ہونے والے اسکریپ، بجلی کی کھپت اور مخصوص ایچ ایس کوڈز کے تحت اسکریپ کی درآمد کو مدنظر رکھا گیا ہے۔

ایف بی آر نے واضح کیا ہے کہ فہرست میں وقتاً فوقتاً تبدیلی کی جاسکتی ہے۔ بورڈ یا متعلقہ کمشنر ان لینڈ ریونیو کی سفارشات پر کسی بھی رجسٹرڈ مینوفیکچرر کی اہلیت کا دوبارہ جائزہ لے کر اسے فہرست میں شامل یا خارج کرسکتا ہے۔