سہیل آفریدی مذاکرات کے ڈرافٹ کی منظوری افغانستان سے لے رہے تھے: طارق فضل

اسلام آباد (ویب ڈیسک): وفاقی وزیر پارلیمانی امور طارق فضل چوہدری نے دعویٰ کیا ہے کہ خیبرپختونخوا کے سابق وزیراعلیٰ سہیل آفریدی مذاکرات کے ڈرافٹ کی منظوری افغانستان سے لے رہے تھے، جس کے باعث مذاکراتی عمل آگے بڑھانے میں مشکلات پیش آئیں۔

جیو نیوز سے گفتگو کرتے ہوئے طارق فضل چوہدری نے کہا کہ وزیراعظم کی ہدایت پر مذاکرات کا آغاز کیا گیا تھا اور حکومت کو امید تھی کہ یہ بات چیت نتیجہ خیز ثابت ہوگی۔

انہوں نے کہا کہ مذاکرات کے دوران چوتھا ڈرافٹ تیار کیا گیا تھا، جس کی منظوری خیبرپختونخوا کے وزیراعلیٰ سے لینا تھی، تاہم ان کے بقول اطلاعات تھیں کہ سہیل آفریدی اس ڈرافٹ کی منظوری افغانستان سے حاصل کر رہے تھے۔

طارق فضل چوہدری کا کہنا تھا کہ محمود اچکزئی کے حوالے سے بھی میڈیا پر خبریں سامنے آئی تھیں۔ ان کے مطابق محمود اچکزئی نے مؤقف اختیار کیا تھا کہ بانی پی ٹی آئی عمران خان سے ملاقات کے بغیر کوئی پیش رفت نہیں ہوسکتی۔

وفاقی وزیر نے مزید کہا کہ مذاکرات میں ملاقات کے لیے ایک ٹائم فریم اور مستند حل موجود تھا۔ ان کے مطابق اگر اس وقت معاملات حل ہوجاتے تو صورت حال آج مختلف ہوسکتی تھی۔

طارق فضل چوہدری نے دعویٰ کیا کہ اگر تحریک انصاف اسمبلیوں سے استعفے دیتی ہے تو اس کے 40 ارکان استعفے نہیں دیں گے۔