سرکاری حج اسکیم واجبات کی دوسری قسط جمع کرانے کی کل آخری تاریخ

اسلام آباد: سرکاری حج اسکیم کے تحت حج پر جانے کے خواہشمند عازمین کے لیے واجبات کی دوسری قسط جمع کرانے کی آخری تاریخ 20 اکتوبر مقرر کی گئی ہے۔ وزارت مذہبی امور نے عازمین کو ہدایت کی ہے کہ وہ مقررہ تاریخ تک ادائیگی مکمل کرلیں تاکہ حج درخواست منسوخ ہونے سے بچ سکے۔

وزارت مذہبی امور کے ترجمان کے مطابق عازمین حج واجبات کی ادائیگی نیشنل آئی ٹی بورڈ کے حج پورٹل یا پاک حج ایپ کے ذریعے کرسکتے ہیں۔ ادائیگی کے لیے بینک کارڈ، ون لنک یا مینول بینک چالان کی سہولت دستیاب ہے۔

ترجمان نے واضح کیا کہ عازمین کے لیے میڈیکل فٹنس سرٹیفکیٹ کی تکمیل بھی لازمی ہے۔ اس مقصد کے لیے حج پورٹل سے سرٹیفکیٹ ڈاؤن لوڈ کرکے ڈاکٹر سے تصدیق کروانا اور پھر تصدیق شدہ سرٹیفکیٹ پورٹل پر اپ لوڈ کرنا ہوگا۔

وزارت مذہبی امور نے عازمین کو ہدایت کی ہے کہ وہ نئی معلومات اور ضروری ہدایات کے لیے پاک حج ایپ سے رجوع کریں اور آخری وقت کا انتظار کیے بغیر واجبات اور دستاویزات سے متعلق تمام تقاضے پورے کرلیں۔