قلات اور گوادر میں سیکیورٹی فورسز کی کارروائیوں میں 4 دہشت گرد ہلاک، پاک فوج کا ایک میجر شہید

کوئٹہ: بلوچستان کے اضلاع قلات اور گوادر میں سیکیورٹی فورسز کی انٹیلی جنس بنیادوں پر کارروائیوں کے دوران 4 دہشت گرد ہلاک ہوگئے، جبکہ گوادر کی تحصیل پسنی میں کلیئرنس آپریشن کے دوران دیسی ساختہ بم کے دھماکے میں پاک فوج کے میجر وجاہت وحید شہید ہوگئے۔

پاک فوج کے شعبۂ تعلقاتِ عامہ (آئی ایس پی آر) کے مطابق انٹیلی جنس معلومات کی بنیاد پر قلات کے علاقے جٹک آباد اور گوادر کی تحصیل پسنی کے علاقے شادی کور میں بھارتی سرپرستی میں سرگرم دہشت گردوں کے ٹھکانوں کی نشاندہی کی گئی تھی۔

آئی ایس پی آر کے مطابق 18 اکتوبر 2026 کو قلات کے علاقے جٹک آباد میں آپریشن کیا گیا، جہاں سیکیورٹی فورسز نے دہشت گردوں کے ٹھکانے کو نشانہ بنایا۔ فائرنگ کے تبادلے کے بعد 4 دہشت گرد ہلاک ہوگئے، جبکہ علاقے سے اسلحے اور گولہ بارود کا بڑا ذخیرہ بھی برآمد کیا گیا۔

ترجمان پاک فوج کے مطابق پسنی کے علاقے شادی کور میں دہشت گردوں کے خاتمے اور علاقے کو محفوظ بنانے کے لیے کلیئرنس آپریشن جاری تھا کہ اس دوران سیکیورٹی فورسز کے دستے کو دیسی ساختہ دھماکا خیز مواد (آئی ای ڈی) سے نشانہ بنایا گیا۔ دھماکے کے نتیجے میں دستے کی قیادت کرنے والے 34 سالہ میجر وجاہت وحید شہید ہوگئے، جن کا تعلق لاہور سے تھا۔

آئی ایس پی آر کا کہنا ہے کہ علاقے میں موجود دیگر دہشت گردوں کے خاتمے کے لیے کلیئرنس اور سینیٹائزیشن آپریشنز جاری رہیں گے۔ ترجمان کے مطابق وفاقی ایپکس کمیٹی کے منظور کردہ وژن ’’عزمِ استحکام‘‘ کے تحت دہشت گردی کے خلاف کارروائیاں جاری رکھی جائیں گی۔

وزیراعظم کا خراجِ عقیدت

وزیراعظم شہباز شریف نے قلات اور گوادر میں سیکیورٹی فورسز کی کارروائیوں کے دوران 4 دہشت گردوں کی ہلاکت پر فورسز کو خراجِ تحسین پیش کیا۔

وزیراعظم نے پسنی میں دھماکے کے نتیجے میں میجر وجاہت وحید کی شہادت پر بھی گہرے دکھ اور افسوس کا اظہار کیا اور کہا کہ میجر وجاہت وحید نے وطن کے دفاع کے لیے اپنی جان قربان کی، قوم کو اپنے بہادر سپوت پر فخر ہے۔

شہباز شریف نے شہید کے اہلِ خانہ سے تعزیت اور ہمدردی کا اظہار کرتے ہوئے ان کے درجات کی بلندی کے لیے دعا کی۔ انہوں نے دہشت گردی کے مکمل خاتمے تک کارروائیاں جاری رکھنے کے عزم کا بھی اعادہ کیا۔