سانحۂ کارساز کے شہداء کی قربانیاں ہمیشہ یاد رکھی جائیں گی، سردار کوہیار خان ڈومکی

صوبائی وزیر صنعت و تجارت بلوچستان اور پاکستان پیپلز پارٹی کے مرکزی رہنما سردار کوہیار خان ڈومکی نے 18 اکتوبر 2007 کے سانحۂ کارساز کے شہداء کو خراجِ عقیدت پیش کرتے ہوئے کہا ہے کہ یہ سانحہ پاکستان کی تاریخ کا ایک دردناک باب ہے۔
انہوں نے کہا کہ سانحۂ کارساز میں جمہوریت کے لیے جدوجہد کرنے والے پاکستان پیپلز پارٹی کے کارکنوں نے اپنی جانوں کا نذرانہ پیش کیا، جن کی قربانیاں ہمیشہ یاد رکھی جائیں گی۔
سردار کوہیار خان ڈومکی کا کہنا تھا کہ شہداء کی جمہوری جدوجہد، عوامی حقوق کے تحفظ اور آئین کی بالادستی کے لیے دی گئی قربانیاں ہمارے لیے مشعلِ راہ ہیں۔
انہوں نے کہا کہ شہداء کو خراجِ عقیدت پیش کرنے کا تقاضا ہے کہ جمہوریت، امن اور عوامی حقوق کے تحفظ کے لیے جدوجہد جاری رکھنے کے عزم کی تجدید کی جائے۔