مستونگ بازار میں ڈکیتی کے بعد دکان نذرِ آتش، تاجروں کا شٹر ڈاؤن احتجاج

مستونگ: مستونگ بازار کے محراب روڈ پر نامعلوم افراد نے مبینہ طور پر ڈکیتی کے بعد نجی آٹوز کی دکان کو آگ لگا دی، جس کے نتیجے میں دکان مالک کو لاکھوں روپے کے نقصان کا سامنا کرنا پڑا۔
دکان مالک کے مطابق نامعلوم ملزمان چھت سے نقب لگا کر دکان میں داخل ہوئے اور کھاتہ والی کاپی، نقدی سمیت دیگر قیمتی سامان چوری کرلیا۔ واردات کے بعد ملزمان نے دکان کو آگ لگا دی۔
واقعے کے خلاف مستونگ کی تاجر برادری نے احتجاجاً بازار بند کردیا۔ شٹر ڈاؤن ہڑتال کے باعث شہر کے چھوٹے بڑے کاروباری مراکز بند رہے۔
تاجر برادری نے مطالبہ کیا ہے کہ واقعے میں ملوث ملزمان کو فوری گرفتار کرکے چوری شدہ سامان برآمد کیا جائے اور تاجروں کو تحفظ فراہم کیا جائے۔