پاکستان کے خلاف بات کرنے والوں کی نسلیں تباہ کردیں گے، سینیٹر فیصل واوڈا

اسلام آباد: سینیٹر فیصل واوڈا نے پاکستان مخالف بیانات دینے والوں اور قومی پرچم و ترانے سے متعلق اپنے مؤقف کا اظہار کرتے ہوئے سخت زبان استعمال کی اور مخالفین کی نسلیں تباہ کرنے کی دھمکی دے دی۔

نیشنل پریس کلب اسلام آباد میں پریس کانفرنس کرتے ہوئے فیصل واوڈا نے کہا کہ وہ حقائق کی بنیاد پر بات کرتے ہیں اور کئی معاملات سے متعلق پہلے بھی آگاہ کر چکے ہیں۔ ان کا کہنا تھا کہ پاکستان کا جھنڈا یا ترانہ نہ اپنانے والوں اور ایسی سوچ رکھنے والے افراد کے خلاف سخت کارروائی ہونی چاہیے۔

فیصل واوڈا نے خیبر پختونخوا کی گزشتہ 13 سالہ حکمرانی پر تنقید کرتے ہوئے کہا کہ صوبے میں تباہی ہوئی ہے اور ملک یا صوبہ کسی کی ذاتی ملکیت نہیں۔ انہوں نے پاک فوج کے خلاف بات کرنے والوں کے لیے بھی دھمکی آمیز الفاظ استعمال کیے اور کہا کہ پاکستان کے خلاف بولنے والوں کو برداشت نہیں کیا جائے گا۔

سینیٹر فیصل واوڈا نے کہا کہ دہشت گردی کا خاتمہ بنیادی مطالبہ ہے اور ان کے بقول غیر ملکی دہشت گردوں اور شدت پسند عناصر کے خلاف اقدامات ضروری ہیں۔ انہوں نے یہ بھی کہا کہ خیبر پختونخوا کے عوام مشکلات اور معاشی مسائل کا سامنا کر رہے ہیں۔

انہوں نے مزید کہا کہ آئندہ 180 دن کارکردگی کے حوالے سے اہم ہوں گے اور وہ ہر ماہ پیش رفت سے متعلق آگاہ کریں گے۔ ان کے مطابق اس عرصے میں دہشت گردی کی صورت حال میں اتار چڑھاؤ آ سکتا ہے، تاہم کارکردگی کا جائزہ لینا ضروری ہوگا۔

فیصل واوڈا نے سیاسی قیادت پر تنقید کرتے ہوئے کہا کہ اگر موجودہ کابینہ مؤثر انداز میں کام نہ کر سکی تو خیبر پختونخوا میں مزید سیاسی تبدیلیاں سامنے آ سکتی ہیں۔