چیئرمین ڈاکٹر جاوید اختر جمالی کے ترقیاتی اقدامات، شاہوزئی محلے میں سیوریج سسٹم کی تعمیر جاری

نکاسیٔ آب کے دیرینہ مسئلے کے حل کی جانب اہم پیش رفت، شہریوں کا ترقیاتی کاموں کا خیرمقدم

گنداخہ: ( نامہ نگار فریداحمد) چیئرمین میونسپل کمیٹی گنداخہ ڈاکٹر جاوید اختر جمالی کی جانب سے شہر میں بنیادی شہری سہولیات کی فراہمی، نکاسیٔ آب کے نظام کو بہتر بنانے اور عوامی مسائل کے حل کے لیے ترقیاتی اقدامات کا سلسلہ جاری ہے۔ اس سلسلے میں شاہوزئی محلے میں ان کے فنڈز سے سیوریج سسٹم کی تعمیر کا کام جاری ہے، جسے علاقے میں نکاسیٔ آب کے مسائل پر قابو پانے اور شہریوں کو بہتر بلدیاتی سہولیات فراہم کرنے کی کوششوں کا حصہ قرار دیا جا رہا ہے۔شاہوزئی محلے میں سیوریج سسٹم کی تعمیر سے متعلق شہریوں نے اطمینان کا اظہار کرتے ہوئے کہا کہ نکاسیٔ آب کا مؤثر نظام کسی بھی شہر کی بنیادی ضرورت ہے۔ سیوریج نظام کی بہتری سے نہ صرف گندے پانی کی نکاسی میں درپیش مشکلات کم کرنے میں مدد ملے گی بلکہ صفائی ستھرائی کی صورتِ حال بہتر بنانے اور شہریوں کو روزمرہ زندگی میں درپیش مسائل سے نجات دلانے میں بھی معاونت حاصل ہوگی،شہریوں کا کہنا تھا کہ گنداخہ میں بنیادی شہری سہولیات کی فراہمی اور ترقیاتی منصوبوں پر توجہ دینا وقت کی اہم ضرورت ہے۔ شاہوزئی محلے میں سیوریج سسٹم کی تعمیر اسی سلسلے کی ایک اہم پیش رفت ہے، جس سے علاقے کے رہائشیوں کو سہولت ملنے کی امید ہے۔ انہوں نے اس امر پر زور دیا کہ ترقیاتی منصوبوں میں معیارِ تعمیر کو یقینی بنانے کے ساتھ ساتھ انہیں بروقت مکمل کیا جائے، تاکہ عوام ان کے ثمرات سے مستفید ہوسکیں۔شہریوں نے امید ظاہر کی کہ چیئرمین میونسپل کمیٹی گنداخہ ڈاکٹر جاوید اختر جمالی شہر کے دیگر محلوں میں بھی عوامی ضروریات اور مقامی مسائل کو مدنظر رکھتے ہوئے ترقیاتی منصوبوں کا دائرہ وسیع کریں گے، تاکہ گنداخہ میں سیوریج، صفائی ستھرائی اور دیگر بنیادی شہری سہولیات کی بہتری کے ذریعے عوام کو درپیش مشکلات کا ازالہ کیا جاسکے۔